By MR10 
3 شهور فاتوا على طلاقي من زوجتي
اتجوزنا من 4 سنين ، اول سنه كانت حب ودلع
بعدها الأمور بينا ساءت لما مخلفناش
روحنا كشفنا والدكتور طلب مننا تحاليل
والنتيجة طلعت أن مراتي مبتخلفش
عندها مشكله في الرحم
مصيبة كبيرة ..انا بحبها بس في نفس الوقت
عايز حتة عيل يشيل اسمي ..خصوصا واني مليش اخوات
ابويا ما*ت من مدة وأمي عايشة مع خالتي بلد تانية
الخلافات زادت بيني وبين مراتي ..متحملتش
طباعي اللي بقت صعبة وطلبت الطلاق
مكنتش عايز الأمور توصل بينا لكدا
بس هي حست اني مبقتش بحبها زي الأول
انفصلنا من 3 شهور ورجعت تاني بعيش لوحدي
في الشقة الايجار اللي ساكن فيها من يوم جوازنا
فكرت ارجع البلد..بس امي كانت بتقولي
هترجع وتسيب شغلك ليه ، هنا حال البلد واقف
خليك عندك ..ودور لك على عروسه تسعدك وتهيك
وتخلف لك العيل اللي نفسك فيه
بصراحه هي عندما حق ..انا لازم اتجوز واعيش حياتي
خصوصا واني معنديش مشكله في الأنجاب
ايه المانع ؟ حبي لطليقتي مش لازم يوقف حياتي
الدنيا اصلا مبتقفش على حد
في الشغل كان معايا وحده عينها مني
وبتشاغلني ..بس انا كنت رافض اخون مراتي
وبعد ما عرفت اني أطلقت ..أبتدت تقرب مني أكتر
وعرفت توقعني بطريقتها ..كانت طيبة معايا
وبتسأل عني وبتهتم بيا جدا
سألتني سبب طلاقك ايه من مراتك
قولتلها انها مكنتش بتخلف
قالت احسن انك خلصت منها ..لازم تتجوز
وتشيل ذريتك ويبقوا سندك لما تكبر وتعجز
بشوية دلع منها على حنيه واهتمام ..طبيت
واتقدمت لها واتجوزنا ..بس شرطت عليها
متنزلش المصنع تاني..مبحبش مراتي تشتغل
عايزها تبقى معززة مكرمة
قالت انها هنزل عشان أساعدك
قولتلها لا ..هو انا مش راجل ومش هعرف اكفي بيتي ولا ايه ؟
لا يا خويا انت راجل طبعا وسيد الرجالة ..انت تؤمر
عشنا اول شهر جواز في سعاده وهنا
كانت بتعمل كل حاجه عشان تسعدني
بس بعد كدا كل دا أتغير ..وطلباتها زادت
وبقت مصرفة ومبذرة اوي
زي ما تكون حالفه انها متخليش قرش في جيبي
انا نفسي اوفر واعمل حاجه للزمن
خصوصا لو ربنا كرمني وخلفت
اتعاتبنا واتخانقنا كتير ..بس مفيش فايدة
طلباتها مبتخلصش…لما لقيت انه مفيش فايدة
اضطريت أشتغل على تاكس بعد الشغل
عشان احسن من دخلي واقدر الاحق على طلبات الهانم
فاتت سنه وبرضو مخلفتش ..وفي يوم قابلت طليقتي بالصدفة ..ولقيتها اتجوزت وكمان حامل
وعلى وش ولاده ..كنت هتجنن ساعتها
وقولتلها طب ازاي ؟
ربك بقى لما يريد
كنت همو*ت من القهر
طلقت الست اللي بحبها عشان مبتخلفش
واتجوزت من غيرها ..مطلعه عين امي
في مصاريف وطلبات مبتخلصش
وفي الاخر طليقتي تحمل وانا لسه مخلفتش
طلعت زي المجنون على مركز العقم والولاده
اللي عملت فيها التحاليل
ولما قابلت الدكتور وطلبت منه يفسر لي اللي حصل
بص في التحاليل الخاصه بيا
ودخل بياناتي ع الكمبيوتر
وقالي هو انت يا راجل ..دا احنا لينا اكتر من سنه
بنحاول نوصلك
ليه يا دكتور خير !!
الحقيقه مش عارف اقولك ايه ؟
في ايه بس طمني ؟
انا اسف جدا ..بس البنت المختصه
بأخد العينات ..اتلخبطت وبدلت العينه
بتاعتك انت وزوجتك مع حد تاني ؟
يعني ايه مش فاهم
احنا وقتها حاولنا نكلمك على الرقم
المسجل عندنا ..بس للأسف موبايلك كان مقفول
افتكرت يومها ..اننا لما رجعنا من هناك
وعرفت ان العيب منها مش مني
دبيت معاها خناقة كبيرة ..ومن عصبيتي
ك\\سرت الفون م*يت حته…ولما حبيت أستبدل الخط
بعدها اكتشفت انه مش متسجل بأسمي
فاضطريت اشتري خط جديد
في حاجه حضرتك ؟
لا مفيش ..فعلا انا غيرت الرقم بعدها
طيب احنا اسفين جدا ..
دي نتيجة تحاليل حضرتك انت المدام
..
رجعت البيت وانا مش شايف قدامي
وحسيت أني ظل\متها معايا ..واد ايه انا ندمان
بس خلاص وقت الندم فات
بعد كام يوم كنت راجع هلكان بالليل من
التاكسي .. لقيت مراتي بتقولي
انا عاوزه هدية حلوه بقى
ليه يا ستي عيد ميلادك لسه كان من شهرين !
ولا يمكن عشان سبوع ابن بنت خالتك ؟
منا عارف منسباتكم مبتخلصش
كدا برضو .طب انا زعلت ..ومش هقولك ع الخبر الحلو
خبر حلو ..لا قولي ولو يستاهل هجبلك هدية
كلها 9 شهور وولي العهد هيشرف ؟
ايه !! انتي بتتكلمي جد
ايوه يا حبييي جد طبعا
يااااه أخيرا ..
وفي عز فرحتي سكت فجأة
لما افتكرت كلام الدكتور وهو بيقولي
دي نتيجة تحليل حضرتك والمدام
المدام سليمه ومفيش عندها اي مشكلة خالص
بس المشكلة عندك انت للأسف ..حالة عقم نادرة
من الصعب العلاج منها
حبيبي!! مالك سكت ليه
..