حكاية مطلقه

كامله

حكايه نجاة

انا اسمي (نجاة) .. مطلقه .. اطلقت وانا عندي ١٨سنه.. ايوه .. علشان اتجوزت عندي١٦سنه وبعد تاني سنه جواز بقيت بحمل لقب مطلقه وانا لسه موصلتش العشرين.. طبعا اهلي الي فرضو عليا الجواز في السن ده علشان بابا قال معندناش بنات تقعد من غير جواز .. اول ما تكمل ١٦سنه ويجي لها عريس مناسب تتجوز فورا

سمعت كلام اهلي واتجوزت جواز صالونات .. مكونتش بحب جوزي

طبعا .. فرق بيني وبينه ٣٠سنه يعني انا ١٦وهو ٤٦ سنه يعني بالعربي مفيش اي تفاهم بيني وبينه.. عيشت معاه سنتين خلفت فيهم بنوته وبعدها مبقيتش قادره اتحمل معاملته ليا ييعني مش كفايه فرق السن الكبير لكن كمان بيضــ,,ـربني ويشتمني لحد مزهقت وطلبت الطلاق

طبعا اهلي كانو رافضين الطـ,ـلاق بيقولو معندناش بنت تطلق.. بس انا خلاص جبت اخري.. وفعلا اطـ,ـلقت

ابويا متقبلش الموضوع .. قال لي ولا اعرفك ولا تعرفيني .. خودي بنتك وروحي شوفي لك مكان تعيشي فيه.. ماما عيطت واترجته يسيبني اعيش معاهم لكن هو كان مصمم علي رايه

اخدت بنتي ومشيت مش عارفه اروح فين

روحت عند خالتي .. اتحملتني اسبوع بالعافيه وبعد كده جوزها وولادها اشتكو .. قالو لها مش واخدين راحتنا في بيتنا هو احنا ناقصين تجيبي لنا بنت اختك وكمان معاها بنت صغيره؟

مشيت من عند خالتي .. كان معايا شويه فلوس علي دهب بسيط بيعته واجرت شقه صغيره جدا في حي شعبي ودورت علي شغل واشتغلت بياعه فيمحل ملابس ووديت بنتي حضانه علشان اقدر اروح شغلي.. وقولت انا هعيش واربي بنتي ومش هحتاج مساعده من حد

عرفت امي مكاني وبقت تيجي تشوفني وتطمن عليا من ورا ابويا.. بابا خلاص اعتبرني ميته وقال لها انا خلاص معنديش بنت اسمها نجاة.. وخالتي كمان كانت بتيجي تسال عليا وعلي بنتي.. حسيت معاهم ان لسه ليا اهل انا وبنتي

فضلت عايشه انا وبنتي سنين ولما ابويا مـ,ـات امي حاولت معايا اني اروح اعيش معاها بس انا خلاص اتعودت اني عايشه مع بنتي ومدرستها وشغلي في المكان ده يعني مش مضطره انقل حياتي كلها مكان تاني

وبنتي كمان صحابها ومدرستها وحياتها هنا

انا عيشت محـ,ـرومه من حب الاب بسبب ذنـ,ـب معملتوش.. ابويا عمره ما وقف جنبي ولا حسسني بالامان والحب .. كان الحب بالنسبه له انه ياكلنا ويشربنا ويجوز.نا .. هو ده الحب..وامي كمان ست طيبه ومغلوبه علي امرها بس عمرها ما صاحبتنا ولا فكرت تقرب من بناتها

علشان كده انا قررت اعامل بنتي عكس المعامله دي .. عوضتها عن غياب ابوها وخليتها تحس بحب الام والاب.. انا كنت امها وابوها واخوها .. مكونتش حرماها من اي حاجه اتمنيتها وكنت مصحباها .. انا وهي كاننا اتنين اصحاب مش ام وبنتها

انا كنت قريبه منها في السن.. الناس كانو بيفتكروني اختها الكبيره وبيستغربو لما يعرفو اني امها

بنتي اول موصلت تالته ثانوي بدات تتغير وتحس انها عايزه تحب وتتحب زي باقي البنات .. ومكانتش بتخبي عني حاجه وانا كنت بنصحها دايما انها تختار االانسان الصح الي يستحق حبها .. الشخص الصادق الي ميضحكش عليها ولا يخدعها.. وهي كانت بتسمع كلامي

في يوم قالت لي انها اتعرفت علي شاب كويس جدا وهي مبسوطه .. قولت لها اني لازم اتعرف عليه علشان ابقي مطمنه علي بنتي… قالت لي بين يا ماما مش دلوقتي احنا لسه في بدايه التعارف.. بعدين نبقي نتعرف علي اهله وانتي تتعرفي عليه

قولت لها ماشي بس متخبيش عليا اي حاجه لازم تعرفيني كل كلمه يقولها لك واكون معاكي في كل خطوه.. قالت لي ايوه ياماما انتي صاحبتي وعمري ما هخبي عنك حاجه.. متخافيش ياماما انا مش هعمل حاجه تضايقك .. انا بس اكمل السنه دي وادخل الجامعه وهو يجي يتقدم لي علي طول ونتخطب

وفعلا اول ما خلصت امتحانات قالت لي ان (محمد) عايز يجي يقابلني.. قولت لها اهلا وسهلا جايين امتي؟ .. قالت لي هو جاي الاول لوحده يتعرف عليكي وبعدها يبقي يجيب اهله

اول مشوفته اتصـ,ـدمت.. لقيته صغير في السن يعني ادها تقريبا.. وكمان شكله ابن شوارع يعني لبسه واسلوب كلامه والفاظه مش حلوه.. عكس بنتي تماما.. استغربت وقولت لها هو ده محمد الي كونتي طايره بيه السما وبتحكي لي عنه طول الوقت؟

قالت لي ايوه ياماما.. ماله؟

قولت لها لا ده مينفعكيش يابنتي.. هي دي النصايح الي كنت بنصحك بيها؟

قالت لي ياماما انا بحبه وعيزاه

قولت له ياابني انت لسه صغير وقدامك وقت طويل علي متقدر تفتح بيت وتتجوز

يابني انا معنديش بنات للجواز

الولد زعل ومشي.. وبنتي قعدت تصرخ وتقول لي حرام عليكي انا بحبه وهو بيحبني ليه تحرمينا من بعض؟

قولت لها يابنتي ده مش مناسب خالص

قالت لي انا بقول لك بيكي من غيرك هتجوزه… قولت لها وانا بقول لك مفيش جواز.. وانا غلطانه اني اديتك الحريه

قالت لي ياماما انا مينفعش متجوزش محمد

انا وهو غلطنا مع بعض..مكدبش عليكم انامحسيتش بنفسي فضلت اضـ,ـرخ والطم علي وشي .. قولت لها ازاي؟ وامتي؟

قالت لي هو كان بيجي لي هنا البيت لما بتكوني انتي في الشغل.. يعني مش مره واحده.. لا مرات كتير .. يعني دلوقتي مينفعش اسيبه لازم اتجوزه

اتصلت بالولد وكلمته لقيته بيسمعني نفس الكلام الي انا قولته له .. ياطنط انا لسه صغير مش بتاع جواز.. ولسه مينفعش افتح بيت

قولت لبنتي انتي ليه خونتي الثقه والحريه الي انا اديتهم لك؟ ليه عملتي كده فيا وفي نفسك؟.. انتي ضيعتي نفسك

بنتي دخلت في حاله اكتئـ,ـاب وكنت بسمعها بتترجاه يجي يتجوزها وان انا موافقه اجوزها له.. بس هو خلاص بقي رافض موضوع الجواز وبيقول لها مامتك رفضتني ومستحيل اتقدم لك تاني.. انا مترفضش

فكرت اكلم اهله بس اول كلمه هيقولوها انتي معرفتيش تربي بنتك

فكرت ابلغ عنه الشرطه بس هقول لهم ايه؟ بنتي كانت بتجيب واحد البيت بمزاجها؟

انا حاسه ان بنتي ضاعت.. مش حاسه هي فعلا ضاعت

عارفه انكم هتلوموني وتقولو انتي السبب

بس انا مكونتش عايزه بنتي تعيش الحرمان الي انا عيشته .. بس طلعت فاهمه غلط..

انا اديت لها حريه فوق اللزوم في سن صغيره هي مش فاهمه لسه .. علشان كده استخدمت الحريه غلط.. ضيعت نفسها وضـ,ـيعتني معاها

بنتي دلوقتي بتلوم نفسها ليل ونهار علي الثقه الي ادتها له مش في مكانها ولا وقتها

طول الوقت بتطلب مني اسامحها