لاني عايش لوحدي

في ليلة حسيت بالجوع وانا سهران في البيت ولاني عايش لوحدي ..ومش هقدر احضر أكل وبكره اجازه من شغلي
وعشان لسه قابض المرتب ..فقررت اني ادلع نفسي وانزل اتعشى في اي مكان بره
كانت الساعه ١ صباحا ..قررت انزل ومطلبش دليفري
لاني كنت مخڼوق وعاوز اغير جو ..
اتمشيت كتير وعديت على اكتر من مطعم ..جربتهم كلهم قبل كدا فيهم الكويس وفيهم اللي اكله تعبان
كملت مشي وخرجت بره المنطقه الي عايش فيها
اخدت تاكسي وع الطريق لمحت يافطة لمطعم
اول مره اخد بالي منه رغم اني بعدي من قدامه كل يوم
لف من فضلك يا اسطى وارجع ورا شويه
السواق استغرب وهو بيبص لي
و قالي تمام
وقف وحاسبته ووقفت قدام المطعم اللي كان
شكله شيك من بره رغم أنه شكله مطعم صغير
دخلت من الباب الازاز ..وكان المكان فيه كام ترابيزه
اخترت اللي جنب الشباك
كان المكان فاضي مفيش زباين
الديكورات حلوه والمكان شكله نضيف
وفي ريحة اكل حلوه تفتح النفس
ثواني ولقيت ست لابسه يونيفورم
جات وقالت
اهلا بيك يا فندم نورت المكان
اهلا ..هو المكان لسه جديد
ايوه يا فندم ..بس دا تاني فرع لينا
والفرع الأول فين
في أكتوبر
اها ..جميل
دا المنيو وفي خصم 10 عشان الافتتاح
بجد !!ا دا شي عظيم
اه وفي كمان مشروب هديه مني على حساب المحل
انا مش عارف اشكرك ازاي
لما تدوق الاكل يا فندم الاول ويعجبك
اكيد هيعجبني …اكيد
وعلى فكرة انا صاحبت المطعم ..وبعمل الاكل بنفسي
بجد
انا هادية
وانا حازم
تشرفنا
الشرف ليا
بصيت لها وهي بتتكلم .كانت ست جميله في أواخر التلاتينيات من عمرها ..قوامها مظبوط ..شعرها ناعم
عيونها حلوه وضحكتها اجمل
ابتسمت وانا بقول
هتختار ايه يا فندم
بصيت للمنيو وقولت ..اه نسيت
كان في أصناف كتيير ..فكرت شويه وقولت
مش عارف ..
ايه محتار
اه
تحب اختار لك انا حاجه على ذوقي
ياريت
ضحكت برقة وقالت ..يبقى هتاكل حاجه هتعجبك اوي
وسابتني ومشيت
حسيت بإحساس غريب
المكان شكله شيك والست جميله وبتعمل الاكل بنفسها
رغم أنها صاحبة المكان
هو مش غريبة
ردت وقالت من جوه
ايه اللي غريبة
انك صاحبة المطعم وشغاله بنفسك
اه دا عشان لسه المكان جديد والشغل خفيف
اول ما الدنيا تظبط اكيد هشغل ناس معايا
اها ..تمام
جابت السلطه وحطتها قدامي وقالت
مقولتليش انت شغال ايه يا حازم
شغال كاشير في محل حلويات
ومرتاح في شغلك
وهو في شغل مريح في الدنيا
اه في وموجود لو عاوز وبالمرتب اللي يعجبك
شغل ايه دا وفين
قربت مني وقالت ….
يتبع
هادية 1
2
شغل ايه دا
قربت من ودني وقالت
.
متستعجلش على رزقك
بعد مرور نص ساعه
ها ايه رأيك في الأكل
هايل ..حاجه عظمه بجد.. تسلم ايدك
ميرسي لذوقك
وقبل ما امشي ..طلبت مني رقم موبايلي
عشان نتواصل مع بعض أول ما يكون الشغل الجديد متاح
شكرتها ورجعت البيت وانا مبسوط
دخلت شقتي ورحت الاوضة رميت نفسي ع السرير
وانا مفيش في خيالي الا صورتها وهي بتضحك
ونبرة صوتها بتعزف في وداني
بس قولت لنفسي في ايه يا حازم فوق شويه ..اولا دي ست اكبر منك ب ٥ سنين ع الأقل وغالبا متجوزه ..رغم اني مشفتش اي دبله في أيدها ..بس معقول وحده بالجمال والرقه دي تكون لسه انسه ..لا ما اظنش
نمت وصحيت الصبح على منبه الفون ..قفلته
وقومت لقيتني بهدوم امبارح ..غيرت بسرعه ونزلت جري ع الشغل عشان متأخرش
فات اليوم عادي ..خلصت ورجعت ..اكلت وريحت شويه
وكل دقيقه ابص ع الفون ..مستني منها اتصال
رقمها مش عندي ..غبي اني مأخدتوش
يا ترى هتتصل امتى
مش يمكن تكون مشغوله أو نسيت اصلا موضوعي
بس لا ..ما اعتقدش
الوقت مش راضي يفوت وانا مستني مكالمه منها
عيني غفلت كم دقيقه قبل المغرب ..وصحيت على جرس الفون ..قومت بلهفه مسكته وارد عليه
الو ..ازيك يا حازم
خيبة أمل
اهلا يا امي عامله ايه
مال صوتك يا واد
لا
—
مفيش بس كنت مريح شويه
طمني عليك عامل ايه ..صحتك وشغلك
كله تمام يا امي متقلقيش انا بخير
بتاكل كويس ولا لا
اطمني انا بخير…المهم انتي واخواتي عاملين ايه
كلنا بخير مش ناقصنا غير شوفتك
قريب يا امي اول ما هاخد اجازه هنزلكم البلد
سلميلي ع كل اللي عندك ..
حاضر خلي بالك من نفسك
وانتوا كمان مع السلامه
اليوم فات وبرضو متصلتش
حسيت بأحباط
غدا يوم و ٢ وبرضو متكلمتش
معرفش في ايه هي نسيتني ولا لسه الموضوع مظبطش مش عارف ..
اليوم الرابع لقيتها بتكلمني بعد العشا ساعه
حازم ازيك انا هاديه
اهلا هاديه اخبارك
انا كويسه وانت
الحمدلله تمام ..تمام اوي
صوتها زي ما يكون رد فيا الروح
انت فاضي ولا مشغول
حتى لو مشغول افضالك
طيب عاوزه اشوفك دلوقت
فين في المطعم
لا في كافيه هبعتلك اللوكيشن تجيلي عليه
بعد ساعه من دلوقت
وصلت في المعاد ..دخلت عيوني بتدور عليها في كل مكان
لمحتني رفعت أيدها وشاورتلي
سلمت عليها ..لمست ايدها خلتني قشعرت
فضلت باصص لها في عيونها وسرحت
ابتسمت فأتلخبطت اكتر ..سلامي طول
وهي حست بخجل وانا لسه ماسك أيدها
سحبتها من بين صوابعي بلطف وقالت
اخبارك عامل ايه
قعدت انا بقول
احمممم ..انا كويس ..كويس جدا
وانتي
اممم يعني
مالك في حاجه ..وليه متقابلناش في المطعم بتاعك
تشرب ايه الاول
بصيت للمكان وانتبهت أن الكافيه شكله غالي جدا
معرفتش اقول ايه
قالت أنا اللي عازماك
لا طبعا ميصحش ..مش كل مره
يا سيدي متعملش تكليف
لا ابدا مش هينفع ..
طيب خلاص انا هشرب لمون
وانا كمان
ممكن تكلميني عنك شويه
انا معرفش عنك حاجه تقريبا
حابب تعرف ايه
كل حاجه
كل حاجه !!
لا مش قصدي ..بصي اه كل حاجه بقى
ابتسمت وقالت
انا يا سيدي هاديه ٣٨ سنه ..ليسانس اداب
..بداية حياتي كانت في اسرة متوسطة ..بابا موظف حكومي امي ست بيت ..عشنا حياة كويسه اهلي عملوا كل اللي يقدروا عليه عشاني انا واخواتي ..
احنا بنتين وولد اخويا الكبير اشتغل مهندس
وهو حاليا مهاجر استراليا متجوز ومستقر هناك
واختي الأصغر مني متجوزه وعايشه في اسكندريه
اها طب وبابا وماما
للأسف بابا توفى وانا في اخر سنه في الجامعه
وامي ماټت من سنتين
الله يرحمهم ..انا اسف
وفجأة دموعها نزلت ..
معلش والله مش قصدي حقك عليا
انت مش متخيل يا حازم فراقهم اثر فيا ازاي
انا بقيت وحيده وكارهه الدنيا
ليه هو انتي مفيش حد في حياتك ..أقصد يعني مرتبطيش قبل كدا