By MR10 
شيمو
الحلقه الاولي والثانيه والثالثه
الحلقه الاولي
ابطال القصه
ادهم: ظابط مخابرات كفؤ جدا. مالوش اصحاب منعزل عن الجميع
ليلي: مدرسه جميله جدا. رافضه الارتباط باي حد عادي. عايزه حد مميز يزلزل كيانها كله
الباقي هنتعرف عليهم مع احداث القصه.
بدات الحكايه باستدعاء للمقدم ادهم عند مديره
المدير: اتفضل يا سيادة المقدم
ادهم: اؤمرني
المدير: الامر لله وحده يا ابني. عايزك في مهمه جديده
ادهم: حدد الزمان والمكان والمطلوب مني
المدير: مش تسأل الاول طبيعه المهمة ايه؟ مش يمكن ما تعجبكش؟؟
ادهم: وانا من امتي بتفرق معايا طبيعه المهمه؟ مهما كانت موافق عليها
المدير: شوف يا سيدي. في بلد صغيره بعيده شويتين وهاديه جدا بس المشكله ان في عصابه جديده استولت علي البلد
ادهم: والبوليس مش عارف يتعامل معاهم؟؟
المدير: البوليس مش عارف مكانهم هما بينزلوا يضـ,ـربو ضـ,ـربتهم ويختفو تماما. ده غير انهم مسلحين ومحدش بيعرف هيهجمو امتي
ادهم: وضـ,ـرباتهم بتكون عباره عن ايه؟ وفي بلد هاديه صغيره زي اللي حضرتك وصفتها مش هيكون فيها اي مكاسب ليهم
المدير: اختيارهم للبلد كان علشان يختفو فيها مش علشان الشغل، هما بيشتغلو في التهريب مخدرات سلاح اثار اي حاجه. اما اهل البلد بيستافدو منهم في الاكل والبنات
ادهم: البنات؟؟ ازاي يعني؟؟
المدير: كل فتره كده رئيسهم بيشتاق للستات فينزلو يخطفو بنت والمشكله بقي انه بيخطف البنات بس. ديما بيختار بنات عذراوات وبيرجعهم تاني بعد ما يتناوب عليها هو ورجالته وطبعا ده بيدمر البنت او بيقـ,ـتلها وبيدمر عيلتها كلها
ادهم: واهل البلد ازاي بيسمحوا بده؟
المدير: اهل البلد غلابه وتحت تهديد السلاح في الاخر بيستسلموا
ادهم: فهمت كده. المفروض اسافر امتي؟
المدير: في اقرب وقت ياريت
ادهم: النهارده لو تحب
المدير: خلاص جهز نفسك بحيث تتحرك بكره وهناك هيستقبلك اهل البلد والمسؤلين من البوليس بحيث يفهموك الوضع هيكون ازاي ويدوك القضيه كامله. اتوكل علي الله
اتحرك ادهم لمهمته الجديده وهو معندوش اي فكره ان حياته كلها هتتوقف علي مهمته الجديده
في البلد
اهل البلد متجمعين ومستنين الامل الجديد اللي هيخلصهم من الكابوس اللي عايشين فيه
مدير الشرطه: المفروض انه علي وصول
واحد من كبار البلد(عم محمود): بس واحد هيعمل ايه يعني؟ المفروض كانوا بعتوا فريق ولا كتيبه لكن واحد؟؟
مدير الشرطه: اللي اعرفه عن اللي باعتينه ان هو بيمثل كتيبه كامله لوحده وهو من اكفأ الظباط هو لوحده كفايه
عمده البلد: يارب يوصل ويخلصنا من المصيبة دي.
مدير الشرطه: هيوصل ان شاءالله
اهل البلد متجمعين في ساحه كبيره مستنين وصوله وفجأة ظهرت عربيه من بعيد بتقرب عليهم
مدير الشرطه: اهو وصل اهوه في معاده بالتمام
قربت العربيه ووقفت واتفتح بابها ونزل صحابها منه
طويل عريض قوي ظابط بكل معني الكلمه
بس الكل اتصدم اول ما شافوه وتنحوا
عمده البلد: اعوذ بالله من الشيطان الرجيم
عم محمود: سلام قولا من رب رحيم
مدير الشرطه فاتح بوقه ومنطقش
وبعد لحظات من الصمت والخوف والرهبه من الزائر الجديد. نطق الزائر
: انا المقدم ادهم صبري عبد السلام
مدير الشرطه: ا ه لا ب حض رتك
مكنش عارف يتكلم وبيتهته
ادهم: اهلا بحضرتك
عم محمود لمدير الشرطه: مشيه وكلمهم يبعتوا غيره
مدير الشرطة: هو احنا بنقي ولا ايه وبعدين ده اكفأ ظابط
عم محمود: اكفأ ايه؟ دول بس كانوا عايزين يخلصوا من شكله فبعتوه هنا
انت مش شايف شكله ايه؟
طبعا كل الحوار ده كان بصوت واطي بس كله كان ادهم سامعه وساكت ومش فارق معاه او يمكن يكون اتعود علي رفض الناس لشكله او يمكن يكون بطل يحس باي الم من اي نوع ومفيش شيئ بيوجعه ولا كلام الناس ولا نظراتهم لشكله المشوه….
ادهم شكله مشوه جدا
ادهم بهدوء: لو حضراتكم خلصتوا كلامكم ممكن نتكلم في المهم او لو مستغنين عن خدماتي انا عادي همشي وهتبقوا ريحتوني؟؟
مدير الشرطه: لا مستغنين ايه ده احنا مصدقنا انهم اخيرا عبرونا وبعتولنا حد
عم محمود: والله لو مكنوش عبرونا كان هيبقي احسن
ادهم: شكلي مش عاجبك؟ معلش استحمله
واهي فتره وهتعدي واوعدك اول ما اخلص مهمتي هنا مش هتشوفه تاني
عم محمود دور وشه بعيد وكل ملامحه قرف من شكل الظابط
هنا في صوت اتكلم
:: بابا اتفضلو الشاي اهو
قربت وحطت صينيه الشاي علي التربيزه في النص وهنا شافت الظابط ادهم
:: اهلا بيك في بلدنا يارب البلد تعجبك ويارب تقدر تخلصنا من الكابوس اللي احنا عايشين فيه
ادهم باستغراب انها بتكلمه عادي: ان شاءالله
البنت: انا اسمي ليلي مدرسه هنا وحضرتك
ادهم: مقدم ادهم
هنا ابوها اتكلم
عم محمود: يالا يا ليلي شوفي وراكي ايه
ليلي: بعد اذنكم
مدير الشرطه: الصبح ان شاءالله هبعتلك حد يجيبك القسم عندنا وهوريك ملف القضيه كامل اما دلوقتي فاكيد حضرتك تعبان من الطريق ومحتاج للراحه احنا كنا جهزنا لحضرتك مكان عند….
هنا قاطعه العمده لانه معندوش استعداد حاليا يستقبل مسخ في بيته
العمده: احنا لسه بندور علي مكان مناسب
ادهم ابتسم لانه فاهم اللي حواليه
ادهم: متشغلوش بالكم بمكان اقامتي كلها ساعه بالكتير ومكاني هيوصل
المدير: يعني ايه يوصل؟؟
ادهم: يعني انا هقعد في كرفان( مقطوره كبيره مجهزه للعيشه فيها) وزمانها علي وصول
المدير: بس يا سياده المقدم
ادهم: ما بسش انا هكون مرتاح فيها بعد اذنكم
هتمشي شويه
عم محمود: بس خلي بالك في عيال صغيره في الشوارع
ادهم: عيال صغيره؟؟؟
عم محمود: هيخافو منك
ادهم بمرار: مش همشي في وسط البلد انا عايز اشوف حدودها متخفش علي العيال الصغيره
سابهم وانسحب بهدوء
واول ما بعد أصواتهم كلها عليت
عم محمود: لا استحاله ازاي هنستحمله هنا
العمده: لا وحضرته عايزني استقبله في بيتي؟؟ ده شيطان استقبل شيطان انا؟؟؟
عم محمود: الراجل ده لازم يمشي من هنا
مدير الشرطه: همشيه حالا بس هاتولي بديل ليه!!! والله معروف عنه انه عمره ما فشل في اي مهمه
عم محمود: ويفشل ازاي؟ هو بس يطل بوشه ده واللي قدامه هيفتكره جن ولا شيطان هيستسلم علي طول
كل ده ادهم كان سامعه فبص للارض ورفع الزنط بتاع الجاكت بتاعه غطي راسه في طريقه
هو اتعود علي كل الصفات دي
مسخ. مشوه. جن. شيطان وكل الصفات السيئه اتوصفتله الكل بيحكم عليه من شكله
محدش ابدا حاول يعرفه كانسان علشان كده هو عزل نفسه عن الكل مش ذنبه انه اتشوه في حادثه غيرت حياته من وهو عنده 14 سنه مش ذنبه ان ابوه كان بيكرهه وماصدق الحادثه حصلت فطرده من بيته. مش ذنبه ابدا انه مسخ كده. مش ذنبه ان عمره ما حس بحب او حنيه من اي حد حتي امه محبتوش ولما ابوه طرده ما دافعتش عن ابنها
عايش لوحده وتقبل عيشته دي وتقبل شكله ووحدته وراضي بيها وبيساعد عن طريق شغله اي حد ضعيف او محتاج لمساعده لانه في يوم احتاج مساعده بس ما لقيش حد جنبه
الحلقه الثانيه
ادهم وهو بيتمشي وصل لمكان فاضي كده كله شجر وبس لاحظ ان البلد متحاوطه كلها بالشجر والنخيل اللي كانت مشهوره بيه
وكلها جناين وغيطان الفلاحين
والبلد في النص بالظبط قعد وسرح وافتكر الحادثه اللي غيرت حياته او مغيرتهاش لانه حتي قبل الحادثه مكنش محبوب في بيته
ورجع لذكرياته ل17 سنه لورا ( عمره حاليا 32 سنه والحادثه حصلت وهو عنده 15 سنه)
من 17 سنه
في اجازه الصيف وادهم لوحده في اوضته اللي مش مسموحله يخرج منها غير في اضيق الظروف وفي اخر الليل بالتحديد
دخل ابوه متنرفز عليه
الاب حسين: طبعا سيادتك هنا نايم واخوك احمد بره والله اعلم جراله ايه؟؟
ادهم: هو علي طول بيسهر مع اصحابه لوقت متأخر بره
حسين: انت كمان بترد عليا؟ قوم فز من مكانك وانزل دور عليه ومترجعش البيت من غيره اتفضل
ادهم قام ونزل وهو عارف ان اخوه سهران في نايت كلب مع اصحابه وزمانه سكران ومش حاسس بالوقت بس طبعا هو ما يقدرش يقول لابوه أي شيء لانه ما بيصدقش اي شيء عن ابنه المبجل
راحله ادهم وفعلا لقاه سكران وسنده ووصله لحد عربيته وطلب من اخوه احمد انه يسمحله يسوق العربيه هو او يروحو بتاكسي لانه سكران
ادهم: احمد هات المفاتيح وانا اسوق
احمد: واخيرا الفرصه جاتلك تسوق عربيتي صح؟ بس ده بعدك
كان بيتكلم وهو بيطوح
ادهم: انت سكران ومش هتعرف تسوق لو سمحت يا احمد طب بلاش تعال نركب تاكسي
احمد: انا هسوق ولو مش عاجبك روح انت مشي
ادهم: علشان ابوك يقولي سيبت اخوك اركب وربنا يستر
ساق احمد بسرعه مجنونه وادهم جمبه بيحاول يخليه يهدي بس احمد كان مجنون ومش حاسس بحاجه
خاف ادهم على اخوه وفك حزامه علشان يعرف يوصل لحزام اخوه علشان يربطهوله وربطله الحزام بس للاسف ملحقش يربط حزامه تاني لان في اللحظه دي احمد فقد السيطره علي العربيه والعربيه لفت بيهم وخبطت في عربيه نقل محمله الواح زجاج
وطبعا لان ادهم مش رابط حزامه فطار من العربيه من زجاجها القدماني اللي اتكسر ولبس في العربيه النقل ونزل وسط الزجاج اللي اتكسر كله حواليه وفوقه من الحادثه
الناس وقفت وحاولو يطلعو احمد من العربيه لانها كانت بدات تولع وفعلا طلعوه وراحو لادهم كان القزاز مغطيه كله وتقريبا بينزف من كل حته حاولو يشدو بس كل ما بيحركوه القزاز بيدخل في جسمه اكتر ولو سابوه العربيتين لو واحده انفجرت التانيه هتنفجر
فشدوه وطلعوه والقزاز في كل حته في جسمه واخيرا نقلوهم المستشفي
وهناك اتصلوا باهلهم
حسين اخد مراته حنان وراحو للمستشفي
وطلعوا للدكتور
حسين: طمني ابني اخباره ايه؟
الدكتور: هما اتنين مش واحد بس واحد فيهم حالته كويسه لانه كان رابط الحزام فيدوب خبطه بسيطه وضلع او اتنين مكسورين اما التاني هو اللي حالته صعبه لانه خرج بره العربيه ومن سوء حظه انه نزل في عربيه قزاز فده سببله جروح كتيره والمشكله الجروح اللي في وشه
اخدهم الدكتور عند ادهم لان حالته الخطيره واول ما شافوه
الاب: ده اللي حالته خطيره؟
الدكتور: ايوه الكبير حالته زي ما قلتلك كويسه
الاب: ده مش مهم ولو مات يريح انا عايز اشوف ابني التاني
الدكتور: بس ده اللي محتاجكم جنبه حاليا
الاب: وانا بقولك عايز اشوف ابني
الدكتور : اتفضل من هنا وخرج قدامهم
وقبل ما الاب يمشي وطي علي ادهم اللي كان سامع كل كلمه
الاب: كده هتبقي مشوه علشان يبقي اللي جواك شبه اللي براك مشوه من جوه وبره
وبكده عمر ما حد هيحبك ابدا وهتفضل علي طول مكروه
سابه وخرج وراح لابنه حبيبه
ادهم بص ناحيه امه نظره غريق بيتعلق بقشه
نفسه تكلمه ولو حتي مره
امه كانت بطلت تكلمه من وهو عنده عشر سنين منعت الكلام معاه نهائي حتي لو كلمها مش بترد عليه
بصلها ونفسه يسمع صوتها تقوله اي كلمه
وفعلا قربت عليه ووطت علي ودنه وهمست
امه حنان: مـ,ـوت بقي
غمض عينه بعد خمس سنين صمت هيا دي كلمتها ليه
ياتري ايه سر ابوه وكرهه ليه؟
وليه امه ما اتمسكتش بيه؟
ايه اللي وصله انه من عيل في الشارع لظابط مخابرات علي اعلي مستوي؟
هل المشوه من حقه يحب ولا؟؟
الحلقة الثانية
امه كانت بطلت تكلمه من وهو عنده عشر سنين منعت الكلام معاه نهائي حتي لو كلمها مش بترد عليه
بصلها ونفسه يسمع صوتها تقوله اي كلمه
وفعلا قربت عليه ووطت علي ودنه وهمست
امه حنان: مـ,ـوت بقي
غمض عينه بعد خمس سنين صمت هيا دي كلمتها ليه
سابته وخرجت وراحت لجوزها وابنها
عند احمد
احمد: بابا ادهم اللي كان سايق هو كان هيمـ,ـوتنا احنا الاتنين وانا فضلت اقوله يهدي بس كان زي المجنون عايز يقتـ,ـلنا
الاب حسين: بس يا حبيبي اهدي اهو ربنا انتقم منه اشد انتقام الحمد لله انك طلعت سليم ده اللي يهمني ارتاح انت
سابهم وخرج والام قعدت من غير ما تنطق ابدا
احمد: انتي مش مصدقاني صح؟
حنان: وهتفرق في ايه كفايه ابوك مصدقك
احمد: بتحبيه هو وبس عمرك ما حبيتي غيره
حنان:………….
عند الدكتور
الاب: قولي حاله ادهم ايه بالظبط؟
الدكتور: عنده كسر في ضلوعه وكسر في رجله واشتباه في نزيف في المخ والجروح اللي مغطيه معظم جسمه
الاب: الجروح دي اثارها هتخف
الدكتور: تختفي نهائي لأ طبعا وهيحتاج لعمليات تجميل كتيره وخصوصا الجروح اللي في وشه لانها عميقه وهتشوه وشه لو متعالجتش بسرعه واتعملها تجميل انا عارف ان الموضوع مكلف بس حضرتك غني وده شكل ابنك ومستقبله
الاب: هيكلف قد ايه؟
الدكتور: يعني ممكن نعدي 200 الف
الاب: ولو قلتلك هديلك 500 الف بس بشرط انه ميخفش والجروح دي تفضل مفتوحه وانه يتشوه لدرجه ان ابليس نفسه يستعيذ من شكله
الدكتور: افندم
الاب: اللي سمعته
الدكتور: دي خيانه مهنيه
الاب: لو انت مش هتنفذ غيرك هينفذ ويستفاد من الفلوس بعد اذنك
الدكتور؛ استني بس الكلام اخد وعطا
الاب: هتنفذ
الدكتور: وايه اللي يضمني انك متبلغش عني وتوديني في داهيه
الاب: اكتبلك اقرار اني موافق انك تعمل فيه اي حاجه او ان طلبه طب مثلا يتدربوا علي الجروح اللي فيه اي حاجه عايزه تضمن بيها نفسك موافق عليها
الدكتور: اتفقنا
وفعلا بدأت رحله العذاب لعيل عنده 15 سنه مش فاهم ايه ذنبه او ايه الخطأ اللي ارتكبه علشان ابوه يكرهه كده
الد كتور لكام ممرضه
الد كتور: انا اخترتكم انتو التلاته في مهمه هتكسبكوا كتير بس بشرط من غير ولا سؤال موافقين؟
الممرضات: طالما فيها فلوس يبقي موافقين
الدكتور: كويس تعالو معايا
اخدهم لادهم اللي كان بدؤا في علاجه وجبسوله الكسور اللي في جسمه واتاكدوا انه معندوش نزيف وهنا جه دور دكتور التجميل واللي مسؤل عن خياطه جروحه
الدكتور: يالا يا بنات هاتو عندنا علشان نعالج الجروح دي
اخدوه على اوضه وبدؤا ينفذوا خطتهم
الدكتور: انا عايزكم تهتموا بجروحه وتحطوا فيها فتيل وقطن مش عايز الجروح دي تقفل مفهوم
الممرضات: ايه بس…
الدكتور: احنا قولنا ايه من غير ولا سؤال
الاول اربطوه لحسن يفكر يهرب ولا حاجه
فعلا ربطوا ايديه وبدؤا يفتحوا جروحه ويحطوا فيها الفتيل والقطن علشان ما تلتئمش ابدا
ادهم كان متخيل ان ده قمه العذاب بس كان غلطان
كان بيحس انه خلاص هيمـ,ـوت بين ايديهم
واخيرا خلصوا وسابوه وادوله كل الادويه اللي المفروض ياخدها
طلع النهار اخيرا ودخل الدكتور عند ادهم
الدكتور: انا معرفش سر العداء اللي بينك وبين ابوك بس هو بيكرهك قوي وسوري الموضوع مش شخصي
ادهم حاول ينطق بس مقدرش يتكلم
الدكتور عطاله حقنه وادهم حاول يتكلم او يتحرك بس مقدرش
الدكتور: متحاولش تقاوم الحقنه دي هتعملك زي شلل مؤقت مش هتقدر تتحرك او تتكلم او تعمل اي شيئ بس للاسف هتحس بكل شيئ بيحصل انا اسف بس ابوك دفع مبلغ كبير في مقابل ده والا كنت عطيتك بنج استعد بقي
دخلو الممرضات وخدو ه لاوضه تانيه
الدكتور: استنونو غمضوله عنيه
قفلو عنيه وطبعا هو مقدرش يفتحهم تاني لانه فقد السيطره علي كل جسمه
سمع اصوات كتير
الدكتور: طول عمركم بتتدربو علي جثث النهارده بقي هتتدربو علي جسم حي وبينزف ايه رأيكم في المفاجأة دي
اصوات لطلبه فرحانين
واحد من الطلبه: طيب هو متبنج ولا ايه وموافق علي تدريبنا عليه
الدكتور: هو في غيبوبه او تقدر تعتبره ميت اكلينيكيا يعني مش هيحس باي شيء تعمله يالا هنبدا نتعلم اشكال الغرز ونستعمل كل غرزه امته
هنا ادهم كان عايز يصرخ يتحرك يقولهم لا انا عايش وحاسس حرام عليكم بس مش قادر
بدا يجهز نفسه للالم علشان يتحمله بس الالم كان فوق الخيال
ابر كتير بدأت تدخل في جروحه الالم لا يحتمل طيب يعمل ايه
بدأ يدعي
يا رب امـ,ـوت يارب اي شيئ غير الالم ده
حتي الصريخ كانو مستكترينه عليه
عايز يصرخ مش قادر عايز يفوق مش عارف
وهنا فتح عنيه وصحي من نومه علي باب بيخبط
فاق اخيرا من كابوس ذكرياته حط ايده علي وشه وحس بجروحه كانها كانت امبارح وحس بنار في جسمه مكان الابر اللي كانت بتخيط وتتعلم فيه كانها لسه موجوده
( فوق يا ادهم ده ماضي مش حاضر معدش حد يقدر ياذيك دلوقتي فوق)
الباب لسه بيخبط بص في ساعته لقاها 7 الصبح مين ممكن يجيله بدري قوي كده
فتح باب الكرفان لاقاها واقفه قدامه جميله شعرها الهوا بيحركه ملكه جمال واقفه
معرفش ينطق او يتكلم او حتي يفتح بقه
ليلي: صباح الخير مالك مستغرب ليه؟
ادهم: افندم
ليلي: مفيش صباح النور يعني؟
ادهم: افندم اي خدمه
ليلي: شكلها مفيش ما علينا المهم بما انك ضيف في بلدنا وبما انك هنا لوحدك فقلت اجيبلك سندوتشات تفطر بيها ونسكافيه علشان تظبط دماغك كده الصبح اتفضل
ادهم: ومين قال لحضرتك اني عايز فطار او نسكافيه؟
ليلي: كل الناس بتفطر
ادهم: متشكر بس مش محتاج ولا الفطار ولا النسكافيه خديه واتفضلي من هنا
لسه هيقفل الباب حطت ايدها منعته
ليلي: طيب اعمل ايه بالفطار ده؟
ادهم: مش شغلي ومتجيبش فطار تاني ولا تيجي هنا تاني
قفل الباب
ليلي من ورا الباب: هحطهولك هنا علي الترابيزه دي يمكن تغير رايك
وفعلا حطته ومشيت لشغلها اللي كان قريب جدا من مكانه وهو تابعها من بعيد ومستغرب دي عايزه ايه ومش خايفه منه ليه؟؟؟
راح ادهم للقسم وقضي يومه يدرس ملف القضيه
وليلي مروحه عدت علي مكانه لقت القطط بتاكل السندوتشات والنسكافيه في الترمس الصغير مكانه
ليلي: بقي كده؟ لو انت عنيد فانا اعند
واخيرا خلص اول نهار في البلد وادهم الكل بيبصله بخوف او كره او اشمئزاز
بس خلاص مبقاش تهمه نظره الناس ليه
رجع مكانه وطلع سطح الكرفان وفضل يبص للنجوم اللي حفظها كلها وغرق في النوم ورجع لذكرياته اللي بالنسباله كوابيس
من 17 سنه
كان متمدد علي السرير والطلبه بيخيطوا فيه وبيضحكوا ويتعلموا ويغلطو وهما فاكرينه مش حاسس وميعرفوش ان كل ابره بتسحب روحه معاها وهو بيدعي ان الوقت يخلص ويرجع لاوضته
واخيرا جه الدكتور وأعلن ان وقتهم خلص ومشاهم وحمد ادهم ربه انه خلص منهم
بدا يفوق وجم الممرضات رجعوه اوضته
كان في قمه الانهيار والتعب مش قادر حتي ينطق دخل الدكتور
الدكتور: اعملو زي امبارح فكو كل الغرز دي وحطوا الفتيل والقطن علشان الجروح متقفلش
ادهم غمض عنيه لسه العذاب منتهاش
فعلا عملو زي ما الدكتور قال وجه تاني يوم وكله حصل تاني الحقنه الطلبه الألم
ادهم حاول يفكر في اي شيئ
اي شئ يشغل تفكيره عن الالم اللي هو فيه
رجع بذكرياته خمس سنين وافتكر الوقت اللي امه بطلت تكلمه فيه
كان يومها في المدرسه مع اخوه واخوه اتخانق مع اصحابه وبدؤا يضـ,ـربوه واستنجد بادهم
ادهم اتردد لانه لو اتدخل ابوه هيزعل ولو ما اتدخلش اخوه بيضـ,ـرب
واخيرا اتخانق مع اخوه واتحولو كلهم للمدير وطلب أولياء الامور ووصل ابو ادهم المدرسه
والمدير قاله ان الخناقه كانت علي بنت مرتبطه بواحد من عياله وتقريبا حد عاكسها وقامت الخناقه
وطلب المدير من الاب انه يربي عياله لانهم في المدرسه للتعليم مش الحب
دخل حسين علي عياله وسالهم
حسين: مين فيكم المرتبط وبدأ الخناقه علشان بنت؟
احمد: ادهم البنت تبقي حبيبته هو ونداني وانا اتدخلت لما لقيتهم ضـ,ـربوه
ادهم: حرام عليك انت بتكدب ليه؟
احمد: مش بكدب صدقني يا بابا مش بكدب هو اللي بيكدب البنت حبيبته
وكالعاده حسين مش بيحب ادهم ويصدق اي شيئ ضده
حسين: الحساب في البيت مش هنا اتفضلوا
في الطريق
ادهم: احمد انت عارف ان ابوك مش هيعديهالي ارجوك انت مش هيعملك حاجه ارجوك يا احمد
احمد: هيعملك ايه يعني اهو هيتعصب شويه وخلاص
ادهم: ده لو انت لكن انا مش عارف ارجوك يا احمد انت الكبير اتحمل مره نتيجه افعالك
احمد: قوله انك ماعملتش حاجه
ادهم والدموع في عنيه: مش هيصدقني ارجوك يا احمد
احمد سكت وبص بعيد وساب ادهم خايف من عقاب ابوه
وصلو البيت
جسين: انت اطلع اوضتك حالا
خاف ادهم وجرى علي اوضته ومستني ياتري عقابه هيكون ايه
حنان: في ايه؟
حسين: ابنك يا هانم عاملي بلطجي وحبيب في المدرسه
حنان: ادهم استحاله
حسين: دافعي عنه وكل ما هتدافعي عنه همـ,ـوتهولك زياده فاهمه
حنان: استني يا حسين سيبوه هتعمل ايه؟
حسين: هادبه هعمل ايه يعني
زقها بعيد وراح لادهم وخرزانه في ايده
دخل عليه
حسين: عاملي بلطجي هاه
ادهم هيمـ,ـوت من الخوف: مش انا والله ده احمد
حسين: اخرس احمد ده سيدك متجيبش سيرته ابدا انا هوريك البلطجه تبقي ازاي؟
وبدا يضـ,ـرب فيه ويجلده ونسي ان ده مجرد طفل عنده عشر سنين مش اكتر
جلده لحد ما ظهره اتقطع من الضـ,ـرب والولد يصرخ ويصرخ بس مين ممكن ينجده او يخلصه وابوه بيضـ,ـرب فيه زي المجنون وما اخدش باله انه بطل يصرخ وانه غاب عن الدنيل اصلا
هنا دخلت حنان امه
حنان: كفايه هتقتـ,ـله كفايه بقي
وقف حسين وبص للدم الخارج من ظهر ابنه بس ما اتهزش ابدا
حسين: اياك يمـ,ـوت خلينا نستريح قومي من جنبه
حنان في الارض بتعيط
حسين بيزعق: قومي والا هقـ,ـتلهولك دلوقتى قومي
شدها وقامت معاه وبعدها بطلت تكلمه نهائي او ترد عليه او توجهله اي كلمه
وادهم كان عيل مش عارف ابوه بيعمل كده ليه او امه مش بتكلمه ليه
ابوه خرجه من المدرسه وقاله انه ما يستاهلش يتعلم
ومهما اتوسل ادهم يرجع مدرسته ومهما عيط محدش بيحن ابدا
وفي يوم راح لامه
ادهم: ارجوكي اعملي اي حاجه انا عايز اتعلم
حنان:…………
ادهم: هو ممكن يسمعك انتي لو طلبتي منه
حنان:………..
ادهم: انتي عارفه ان احمد هو اللي اتخانق وهو اللي مرتبط وانا اتعاقبت مكانه ارجوكي
ادهم كان بيتكلم وبيعيط زي اي عيل صغير
حنان:……….
ادهم: طب انتو مش عايزيني هنا او بتحبوني ودوني مدرسه عسكريه داخليه واهو تخلصوا مني ومش هاجي غير في الاجازه بس ارجوكي
حنان:…………..
سابها ومشي ودموعه علي خده وراح لاخته ايه الصغيره يلاعبها كان عندها 3 سنين بس كانت بتعشق ادهم الوحيده اللي بتحبه وده كان بيجنن حسين كل ما يشوفها بتضحك معاه
وبياخدها بعيد عنه
واخيرا وافقوا يدخلوه مدرسه عسكريه داخليه علشان يخلصوا منه
وقضي هناك حياته لحد يوم الحادثه
فاق علي صوت الدكتور بيقولهم ان وقتهم خلص
وخرج الطلبه وجم الممرضات وعادوا نفس اللي حصل
بس ادهم اتعلم ازاي يفصل عقله عن اللي بيحصل علشان يستحمل الالم مع انه ساعات بيكون الالم اقوي من انه يستحمله وساعات كان بيغمي عليه
وطول الليل كان يحلم باللحظه اللي هيسيبوه فيها بس كانت احلام
صحي ادهم علي صوت الباب بيخبط ولقي الساعه 7 الصبح
فتح لقاها تاني قدامه ومعاها كيس الفطار والنسكافيه
ادهم: انتي تاني؟
ليلي: صباح النور
ادهم: وبعدين
ليلي: الفطار
ادهم: مش قولتلك مش عايز ايه ما بتفهميش؟
ليلي: ايه اللي هيضرك لما تفطر؟
ادهم: استغفر الله العظيم يا بنتي قلتلك متجيش هنا مش عايز فطارك مش عايز منك حاجه افهمي بقي
قفل الباب في وشها وهيا دمعه فرت من عنيها غصب عنها وهيا مستغربه ليه رفضه ده
ليلي سابت الفطار ومشيت
وهو خرج وشاف الفطار قعد قدام التربيزه يبصله
عايزه مني ايه؟ انا مش حمل جروح تانيه؟ انتي ايه بالظبط؟ ملاك وابليس؟؟ عمرها ما تركب فوق يا ادهم انت شيطان وهيا ملاك عمرها ما تركب ابدا
مشي وساب الفطار علي امل انها تفهم انها مش مرغوب فيها
يا تري هتفهم ولا قلبها دق وخلاص؟ وهل هو شيطان فعلا ولا هما حكموا عليه بانه يكون شيطان؟ هيستسلم ادهم ولا ليلي هتستسلم؟
_________________
الحلقه الثالثه
يوم ورا يوم بيعدي في الصبح ادهم بيستخبي من ليلي بحيث انها تفقد الامل منه وتمشي وبحيث يشوفها من بعيد لبعيد كفايه عليه قوي يلمحها بس وهيا بتحط الاكل مكانه وتمشي ومش بتفقد الامل فيه
ادهم بيقضي يومه يمشط في البلد او يساعدهم في القسم والليل بيفضل مع ذكرياته او كوابيسه
وفي يوم ليلي الصبح خبطت وهو كالعاده مستخبي بعيد يراقبها
ولما ما فتحش قعدت علي الترابيزه وحطت الاكل ودموعها نزلت غصبا عنها مسحتها بس دموعها رفضت تقف وعيطت اكتر واكتر وهيا مش عارفه هو رافضها ليه ومش عايز حتي يديها فرصه تقرب منه
هو شافها بتعيط وفي حرب جواه يروحلها او يسيبها لو سابها خلاص مش هترجع تاني ولو راحت …..
لو راحت هو مش عارف هيوصل لايه؟؟؟
واخيرا القلب تغلب علي العقل
ولسه ليلي هتمشي جه وراها
ادهم: مش بتستسلمي صح؟؟؟
ليلي مسحت دموعها وابتسمت وبصتله
ليلي: مش بحب الاستسلام
ادهم: عايزه ايه؟؟
ليلي: تفطر
ادهم: ودموعك دي علشان افطر بس؟
ليلي: هيا فين دموعي دي؟
ابتسم ادهم: حاضر هفطر
ليلي: بالهنا مقدما
مشيت وهيا الفرحه مش سايعاها اخيرا الجبل اتهز وهيحن
ادهم كمان مش فاهم هيا عايزه ايه او مش عايز يفهم بس اكل اكلها وشرب النسكافيه
ودي تقريبا كانت اول مره ياكل اكل مش بتاع مطاعم من سنين طويله
تاني يوم ادهم قرر انه مش لازم يعيش في وهم ولازم يبعدها فقرر انه يخوفها منه
الصبح ليلي بتخبط وهو قلبه بيدق كان نايم ولابس هدومه هو كان ديما بيلبس بكم علشان يخبي الجروح اللي في صدره وايديه بس قرر انه يخوف ليلي لما تشوف جسمه قد ايه مشوه مش وشه بس
فتح الباب وهو صدره عر.يان
الحلقه الرابعه والخامسه والسادسه
الحلقه الرابعه
وفي يوم دخلت ساره كالعاده تفتش في حاجته وشافت المجلات
ساره: اخيرا مسكتك انا قلت برضه محدش بيذاكر كده ( بصتله) اتكشفت
فاق ادهم من ذكرياته علي الباب وابتسم لان دي اكتر حاجه بيحبها في يومه
لما يشوفها الصبح لبس قميصه وفتح وقابلته بأجمل ابتسامة تسحر اي راجل في الدنيا
فمابالك بواحد محروم
ليلي: صباح الخير
ادهم: صباح النور برضه جايبه فطار تاني؟
ليلي: ايه ده هو احنا مش سبق واتفقنا خلاص
تعال اقعد هنا
راحت ناحيه التربيزه اللي بره الكرفان وقعدت وهو سلم امره وقعد قصادها
ليلي: قدامي تلت ساعه بحالهم اقعدهم معاك ده طبعا لو مش يضايقك؟
ادهم: اقعدي بس بشرط
ليلي: ايه الراجل اللي هيشرط من اولها ده؟لا يا عم مش لاعبه انا ماشيه علي شغلي
ادهم: طيب مش تسمعي الشرط الاول
ليلي: اهو شرط وخلاص الواحد يقول ده انتي تنوريني او ياه ده منايا اي مجامله والسلام مش يشرط
ادهم: طب خلاص براحتك. اللي يريحك اعمليه ( بص بعيد واتضايق)
ليلي: ده ايه الراجل اللي ما بيصدق ده؟ طب امسك فيا شويه اعملي منظر كده
قول شرطك ايه
ادهم:……………..
ليلي: ايه يا عم ما خلاص في ايه بقي قلبتها جد ليه؟
ادهم: شوفي انا مطلبتش منك انك تجيلي او تجيبيلي فطار او تتكلمي معايا
ليلي: يعني ايه انا فارضه وجودي دلوقتي عليك؟؟ لو انا مضايقاك قوي كده هامشي ومش هضايقك تاني
ويدوب وقفت وهتتحرك فمسكها من ايدها
ادهم: مش قصدي كده اقعدي
قعدت وساكته
ادهم: قصدي ان وجودك هنا غريب جدا بالنسبالي والوضع ده كله جديد وانا غير اي راجل فمتتوقعيش مني اي شيئ وشرطي كنت هقولك افطري معايا بس مش اكتر
ليلي: هو انت عمرك ما كان عندك أصحاب قبل كده؟؟
ادهم: لا يا ستي معنديش ولا كان عندي
ليلي حست بعصره في قلبها وكانت عايزه تفرحه باي طريقه
ليلي: طيب يالا نفطر واهي لقمه هنيه تكفي ميه اوك
ادهم ابتسم وده كان شيئ نادر جدا
ادهم: بس هنشرب النسكافيه ازاي مفيش كوبايات
ليلي: عادي هنخمس في الغطا ولا انت مش بتحب؟؟
ادهم: لا عادي مجربتش اصلا قبل كده الموضوع ده
فطروا مع بعض وشربو بالغطا النسكافيه وليلي طول الوقت بتضحك وتهزر وتحكيله عن نفسها وهو بيسمعها ومبتسم ومليون سؤال وسؤال جواه بس معندوش الجراه يسالهم
وفجاه ليلي مسكت الساعه في ايده وصوتت
ليلي: يا لهوي اتاخرت
وطلعت تجري زي المجنونه وهو ضحك عليها وعلي خفتها وروحها الجميله
بس سؤال واحد محيره
هيا عايزه منه ايه؟؟؟؟؟؟؟؟؟؟؟؟؟؟؟
ليلي في الشغل مع صحبتها الانتيم مني
مني: انا نفسي اعرف ليه؟ ايه اللي عاجبك فيه؟ اتعرض عليكي اشكال والوان من الرجاله وفي الاخر ده يعجبك طب ازاي؟
ليلي: معرفش يا مني من اول لحظه شوفته نازل من عربيته وقلبي دق بطريقه غريبه
مني: جته نيله قلبك وزوقك ده
ليلي: انا مش عارفه انتي معترضه عليه في ايه؟
مني: مش عارفه؟ نهار اسود انتي مش شايفه شكله ايه؟
ليلي: ومن امتي الراجل بشكله؟
مني: الراجل مش بشكله اه بس علي الاقل يبقى مقبول حتي
ليلي: وادهم مش مقبول؟ ده طول بعرض بعضلات ده مز من الاخر هما بس كام جرح في وشه ايه يعني؟
مني: كام جرح يا ليلي؟ ده وشه خريطه يا بنتي انتي ازاي شايفاه كده؟
ليلي: شايفاه راجل بمعني الكلمه هدوء كبرياء غموض صبر حاجات كتيره قوي فيه بس محدش بيديله فرصه يطلعها
مني: وانتي بقي هتطلعي اللي جواه؟؟
ليلي: ياريت بس هو يشوفني زي ما انا شايفاه
مني: وهو يطول اصلا ضفرك؟؟؟ انتي اتجننتي رسمي
ادهم حس ان قعدته في البلد هتطول فاتصل بحد من زمايله يبعتوله الكلب بتاعه ماكس
ماكس ده كان الصديق والرفيق الوحيد لادهم
عمره ما خانه او بعد عنه وقالوله علي اخر النهار هيكون عنده.
الكرفان اللي ادهم قاعد فيه كان جنب مدرسه ليلي وجنبهم نادي البلد كبير من غير سور وجنبهم نخيل واشجار كتير لانهم كانو في اخر البلد
وفي وقت الظهر ليلي وهيا مروحه بيتها لمحت ادهم بيتمشي ودخل وسط الجناين ولقت نفسها رايحه وراه
فضل ماشي وهيا وراه لحد ما بعدوا وسط الشجر واختفوا
ادهم: هتفضلي ماشيه ورايا كتير؟
ليلي: انت حسيت بيا؟
ادهم: مبقاش ظابط لو محسيتش بيكي ولا ايه
ليلي: المهم اخبارك ايه؟
ادهم: كويس وانتي؟
ليلي: كويسه مفيش جديد عن العصابه؟
ادهم: لا لسه وملهمش اثر نهائي
ليلي: مبسوط هنا في بلدنا؟
ادهم: ليلي؟
ليلي: هاه
ادهم: ممكن أسألك سؤال بس ارجوكي جاوبيني عليه بصراحه مهما كانت الاجابه واوعدك ان مفيش اي شيئ هيتغير؟؟؟؟
ليلي: أسأل واوعدك اجاوبك بصراحه لو هقدر
ادهم: انتي عايزه مني ايه؟ اللي انتي عايزاه مهما كان هنفذهولك اطلبي بس ارجوكي انتي مش مضطره تقربي مني علشان توصلي للي انتي عايزاه اطلبيه وبس
ليلي: وليه بتفترض اني عايزه منك حاجه؟؟؟
ادهم: امال انتي بتعملي ايه هنا؟؟؟
ليلي: مش يمكن اكون بس عايزه اكون معاك او عايزه نقرب من بعض؟؟؟
ادهم: ليه؟؟؟؟ تقربي مني ليه؟؟؟؟
ليلي: وهو ده بيتقالوه ليه؟؟؟
ادهم: ايوه لما يكون مش منطقي ولا له معني ولا حتي مقبول يبقي يتقال ليه؟؟؟
ليلي: طيب ايه رايك حاليا نخلينا أصدقاء مش اكتر نتكلم مع بعض يعني والباقي واحده واحدة
ادهم: اصحاب؟؟؟؟علي اساس ان مفيش مليون واحد نفسهم يقربو منك او يصاحبوكي فانتي جيالي انا؟؟؟؟
ليلي: ومن المليون دول انا اخترتك انت
ماشيها اصحاب بقي
يالا انا لازم امشي هشوفك بكره اوك
ادهم: همشيها اصحاب اشوفك بكره
مشيت وسابته وهو قلبه وعقله في حرب
عقله: اهرب انت مش حمل جروح تاني
قلبه: لأ مش هتتجرح خليك
عقله: فكر واحده زي دي هتبص لواحد زيك ليه؟
قلبه: وليه لأ يمكن تكون شافت جواك
عقله: لا اكيد عايزه منك حاجه وحتي لو مش عايزه هتكون نزوه او تجربه جديده وهتفوق وانت هتتجرح
قلبه: ويمكن تكون صادقه في مشاعرها وتخسرها لو بعدت خليك يمكن يكون القدر هيعوضك بيها جرب واستني واصبر
وكالعاده بيتغلب القلب علي العقل
” نجرب ونصبر يمكن””
بالليل الكلب بتاع ادهم وصل وكانو مفتقدين بعض جدا
ماكس كان كلب ضخم جدا وكبير في الحجم وشكله يخوف جدا ومبيتقبلش الناس ابدا
ادهم لقاه في مهمه من مهماته وكان صغير ولوحده ومتعور زي ما يكون حد رماه
اخده ورباه وبقي صديقه الصدوق
الاتنين مبيستغنوش عن بعض
في الصبح ادهم صحي بدري لأنه خاف ليلي تيجي وماكس يضايقها
فضل يجري شويه في النادي كرياضه وقبل معادها بعشر دقايق رجع
ليلي جت بدري عن معادها ويدوب هتخبط اتفاجئت بالكلب الضخم ده اللي في الاول معرفتش انه كلب من ضخامته
قلبها دق بس هيا بتحب الكلاب وقفت وبصتله وبدأت تكلمه
ليلي: يا تري بقي صاحبك فين هاه؟؟؟ وسايبك لوحدك ليه؟ لو اعرف انك هنا كنت عملت حسابك في فطار معتبر
ماكس بيبص ليلي وكأنه فاهمها فوقف مكانه وهدي خالص
هيا قربت منه بحذر
ليلي: على فكره انا بحب صاحبك ادهم جدا
ماكس اول ما سمع اسم صاحبه انتبه وكأنه حس بيها او بحبها ده
ليلي: انت كمان بتحبه بقينا اتنين
هنا ادهم جه وشافها قاعده قصاده وكلبه قاعد ومستسلم
ادهم: غريبه
الاتنين بصوله ليلي وقفت وماكس جري عليه
ليلي: ايه اللي غريبه؟
ادهم: اصله مش بياخد علي حد ابدا
ليلي: مش يمكن بيفهم ويحس عن صاحبه
ادهم ابتسم وهيا ابتسمت
ادهم: تعالي اعرفك رسمي عليه، ليلي ده ماكس ( ليلي مدت ايدها تسلم عليه وماكس حط ايده علي ايدها وهيا ضحكت منه ضحكه طيرت عقل ادهم فبصلها وتنح من جمالها)
ليلي: ايه سكت ليه المفروض تعرفني انا بقي
ادهم: سوري ماكس دي ليلي ( وسكت شويه) صديقه مقربه
ليلي قربت منه وباست ماكس
وادهم مستغرب تماما حتي كلبه سحرته
فطروا ومشيت وسابتهم وبعد ما مشيت ماكس قعد قصاد ادهم علي كرسي ليلي
ادهم: ولا كلمه عارف اللي هتقوله، هتقولي فوق بقي من الوهم ده بس يمكن ما يكنش وهم يمكن
عدي اليوم وتاني يوم ادهم مستني ليلي هو وماكس ومجتش وقف مراقب شغلها علشان يلمحها برضه مظهرتش
يوم والتاني
ادهم لماكس: عارف انك نبهتني وانا مسمعتش كلامك، عارف انه وهم وسراب وانا مشيت وراه، بس اعمل ايه كان نفسي…..
ادهم بدأ يحاول يخرجها من تفكيره ويرجع لوحدته وعزلته اللي اخد عليهم
وغرق تاني في بحر زكرياته
ساره: اخيرا مسكتك انا قلت برضه محدش بيذاكر كده ( بصتله) اتكشفت
مسكت المجلات ونزلت جري لجوزها
ساره: صبري صبري تعال بسرعه
صبري: خير في ايه يا ساره؟
ساره: مش قولتلك محدش بيقعد الوقت كله بيذاكر كده وانا لازم اكشفه اديني كشفته
ادهم سامع كل كلمه وهو في اوضته
صبري: تاني يا ساره سيبي الولد في حاله بقي
ساره: المره دي معايا الدليل اتفضل لقيت ايه في اوضته قال بيذاكر قال
صبري مسك المجلات وقلب فيها واتصدم
لانها كانت فيه صور جنس كتير او هيا اصلا مجلات جنسيه
صبري: استغفر الله العظيم بقي الولد ده يطلع منه كده انا مش مصدق ابدا
ساره: يعني هتبلي عليه انا ولا ايه نادي عليه واسأله
صبري نادي علي ادهم وادهم خرج عندهم
صبري: ايه المجلات دي يا ادهم وازاي تجيب حاجه زي كده البيت؟؟؟
ادهم:……………..
معرفش يرد لانه خاف علي مصطفي ليزعلو منه وهو اللي فتحله بيته وساعده
صبري: رد جيبتها ازاي ومنين؟؟؟
ادهم:………………
ساره: عايزه يرد يقول ايه
صبري: الظاهر ان ابوك كان عنده حق في تاديبك بالشكل ده، انا غلطان اني فتحتلك بيتي وشيلتك اسمي واتحديت مراتي وزعلتها بسببك انت خساره فيك اي شيئ
انا ميشرفنيش انك تشيل اسمي
ادهم ساكت ومش عارف يرد كان ديما ابوه بيقوله نفس الجمله
” انا ميشرفنيش انك تكون ابني، انت عمر ما حد هيحبك ابدا انت هتفضل ديما منبوذ””
الظاهر ان ابوه عنده حق هو هيفضل ديما منبوذ من الكل
فاق علي صوت صبري بيزعق وساره
ساره: انا مش هسمح يقعد في بيتي اكتر من كده اطرده
صبري: دافع عن نفسك او قول اي حاجه انطق
ادهم: وادافع ليه انت خلاص حققت وحكمت وهتنفذ الحكم يبقي لازمته ايه
انا اسف لو كنت ضايقتكم في أي حاجه
صبري: انت بجد انسان مستفز بكل بجاحه بتتكلم كانك مغلطتش ولا ارتكبت جريمه يا اخي طيب حتي استسمحنا او اتاسف علي غلطتك انت ايه
ادهم ؛…………….
صبري اتنرفز قوي من سكوته ده وراح ضاربه بالقلم لدرجه ان ادهم كان هيوقع من قوته
صبري: اطلع بره بيتي بره
_______________________
ادهم هيخرج بره البيت ولا لأ؟
ليلي اختفت ليه؟؟ وهيا فاقت من نزوتها ولا؟
ادهم هيعمل ايه مع الدنيا اللي بتخبط فيه؟
عايز توقعاتكم
استنوني
…
ملحوظه
كتير منكم بيقولو اني اوفر في عذابه وان مفيش اب بيعمل كده
عمركم ما سمعتم عن اب بيضـ,ـرب عياله؟
عمركم ما سمعتم عن اب او ام # عياله؟
عمركم ما سمعتم عن اب # بنته؟
عمركم ما سمعتم عن ام بتتجوز وتسيب جوزها يعمل كل اللي عايزه في عيالها؟
محسسني ان الدنيا كلها وردي في وردي وان اب يطرد ابنه او يضـ,ـربه حاجه اوفر!!!
اكيد كلكم بتقروا اخبار او بتسمعو افلام او بتشاركو الواقع اللي احنا فيه
الدنيا فيها بلاوي اكتر من كده بمراحل
الحلقة الخامسة
صبري اتنرفز قوي من سكوته ده وراح ضاربه بالقلم لدرجه ان ادهم كان هيوقع من قوته
صبري: اطلع بره بيتي بره
وهنا فاق ادهم علي الباب بيخبط قام جري ده معاد ليلي اخيرا رجعتله تاني واكيد هيكون عندها سبب لبعدها
فتح الباب بس اتفاجئ بواحدة اول مره يشوفها
كان فاتح بتيشيرت نص كم واول ما فتح البنت اتخضت من شكله وخصوصا الجرح اللي بطول دراعه كلها لحد كف ايده وتنحت عليه
ورجعت لورا خطوتين
ادهم لاحظ نظرتها فخبي ايديه وطبقهم علي صدره
ادهم: افندم حضرتك مين؟؟؟
البنت: انا… انا……
ادهم: انتي نسيتي اسمك؟؟
اابنت: لا انا اسمي مني وليلي بعتتني
طاقه امل اهي من طرفها واكيد هتبلغه رساله
ادهم: خير في حاجه حصلت؟؟؟
مني: لا ابدا خير بس هيا بعتالك الفطار ده
ادهم اتصدم فطار ايه؟ هو مش مستني فطار
ادهم: افندم،؟؟ فطار؟؟ بس مبلغتكيش اي حاجه تانيه؟؟
مني: لا. هو في حاجه المفروض تبلغهالي؟؟
ادهم: لا ابدا بس بلغيها اني متشكر علي اهتمامها وشكرا مش محتاج فطارها بعد اذنك علشان ورايا شغل
قفل ادهم الباب وقعد علي سريره وحط راسه بين ايديه
عقله: مش قلتلك دي نزوه وهتعدي استفدت ايه بقي
قلبه: يمكن يكون عندها عذر؟؟
عقله: تاني انت مش بتحرم ابدا وكان ايه عذر امك اللي محبتكش ولا عذر ابوك اللي شوهك وطردك في الشارع ولا اخوك اللي عمره ما اعتبرك في يوم اخ هتفضل تحط اعذار للناس كده ويجرحوك وبرضه مش بتحرم
مالها وحدتنا ما احنا خلاص اتعودنا عليها
ادهم: الظاهر ان الوحده عمرها. ما هتفارقني ابدا. ليه يا ليلي كده ما انا كنت في حالي تعشميني وتسيبيني بس ارجع واقول انا اللي غلطان انا اللي سمحتلها تدخل حياتي
عدي يوم واتنين وتالت يوم ادهم بابه خبط الصبح بدري فتح واتفاجأ بليلي علي بابه
ليلي: ازيك اخبارك ايه؟
ادهم: وتهمك في ايه اخباري؟؟
ليلي: عندك حق بس مش وقته، قابلني العصر الساعه 5 عند المنتزه اللي في المدينه وانا هفهمك كل حاجه هستناك
ولسه هتمشي
ادهم: مش هاجي فمتروحيش
ليلي: ارجوك اديني فرصه اشرحلك ولو كلامي معجبكش امشي هستناك انا لازم امشي بسرعه
سابته وجريت في حاله مش عارف يحددها
يروح ولا لأ؟ لا مش لازم يروح احنا لسه علي البر ابعد عنها وانت قادر تبعد
خلاص مش هروح
والساعه 5 بالدقيقه ادهم كان واقف علي باب المنتزه وهو بيقدم رجل ويأخر رجل ودخل شافها مستنياه
ايه في الجمال شعرها طويل والهوا بيطيره
جسمها جميل مفيهوش غلطه كلها علي بعضها حلم اي حد
ادهم: انت جاي ليه؟ فوق بقي انت مره واحده عايز تدخل الجنه؟؟ طب تيجي ازاي ومين هيسمحلك؟
ولسه هيمشي لمحته وندهت عليه
ليلي: ادهم انا هنا
راح ناحيتها ووقف قصادها لابس نظاره شمس واكله معظم وشه ورافع ياقه القميص تغطي جزءمن وشه وحاطط زنط علي راسه
ليلي: تعال بس الاول بعيد عن الباب
شدته من ايده وسحبته وراها
هو مستغرب هو ليه مغيب كده معاها؟ وليه ما بيعترضش او يقول اي حاجه؟ بيسبها هيا تتحكم في كل شيئ
دخلو وقعدو في مكان هادي
ليلي: انت متخفي كده ليه؟
ادهم: مش متخفي
ليلي: طيب عايزه اشوفك
قربت منه وشالت الزنط ونزلت ياقه قميصه واخدت النظاره من علي وشه وهو ولا عارف ينطق اصلا
ليلي: كده احلي
ادهم: احلي؟؟؟ انت اكيد مش طبيعيه يا اما نظرك ضعيف جدا
ليلي: ليه بقي؟ انا علي فكره نظري سته علي سته
ادهم: مش باين
ليلي: كل ده علشان الكام جرح اللي في وشك وايه يعني؟
ادهم باستغراب: كام جرح؟؟؟؟؟هههههه
( ضحك ضحكه حزينه)
ليلي: مالك؟
ادهم: بسبب الكام جرح اللي انتي بتقولي عليهم انا اتطردت من بيتي وعشت في بيت تاني مع ناس مش طايقيني وفي كل لحظه بيوضحولي ده واخدت الثانويه منازل والامتحان كنت بقعد في مكان لوحدي علشان الطلبه اعترضوا علي وجودي
وحتي في الكليه عشت لوحدي عمر ما حد قرب مني او عرفني وده كله بسبب الكام جرح اللي انتي بتقولي عليهم
ليلي اتاثرت جدا بكلامه وكان نفسها في اللحظه دي تضمه وتقوله انها هتفضل جنبه بس هو يسمحلها
ادهم: المهم افندم عايزه ايه؟
ليلي: ايه عايزه ايه دي؟
ادهم: عايزاني اقولك ايه؟؟ مره واحده ظهرتي وبعدها اختفيتي
لأ وباعتالي صحبتك بفطار يا شيخه ملعون ابو الفطار علي اللي هياكله
ليلي: اهدي بس وبراحه اولا انا ما اختفتش
ادهم: اه كنتي بتيجي بس ما كنتش باخد بالي
ليلي بنرفزه: ماتهدي بقي وتسمع واسكت شويه،
ادهم: سكت اتفضلي
ليلي: في ناس شافوني اخر مره وانا معاك وماشيه من عندك وقالو لابويا
ادهم: بس خلاص ما تكمليش فهمت الباقي
بعد اذنك
ليلي: استني يا ادهم فهمت ايه؟ لو سمحت اسمعني للاخر
ادهم: اسمع ايه؟ هاه ان ابوكي منعك وان غصب عنك بعدتي ومش بايدك
ليلي: فعلا ده حصل
ادهم: طيب خلاص وانا معترضتش
ليلي: طيب ممكن اكمل كلامي وتسمع من غير ما تقاطعني لحد ما اخلص خالص لو سمحت
ادهم: قولي كل اللي عندك وانا سامعك بس ما تستنيش مني اي رد فعل
ليلي: مش هستني… المهم لما روحت ابويا سألني اذا كنت شفتك ولا لأ ولاني عمري ما كدبت عليه قلتله ايوه واني جيبتلك فطار كزا مره وانت رفضت وبعدها اخدته مني المهم هو سمعني لحد ما خلصت وبعدها انفجر فيا وقالي ما اقابلكش تاني لاي سبب وخلاني ما انزلش الشغل يومين وبعدها بقي يوديني بنفسه
ادهم: والنهارده قولتيله ايه وانت جايه تقابليني؟
ليلي: الحقيقه اني خارجه مع اصحابي اللي فعلا خرجت معاهم وهما بيشتروا شويه حاجات وهقابلهم ونروح مع بعض
ادهم: ودي الحقيقه؟؟؟ وكده ما كدبتيش؟؟؟
ليلي :طيب كنت عايزني اقوله ايه؟؟ اني جايه اقابلك؟؟؟
ادهم: ما اعرفش تقوليله ايه اللي اعرفه اني دي مش هتكون اخر كدبه لو فضلتي مصره علي صداقتنا وهو عمره ما هيتقبل حتي معرفتنا العابره ببعض
ليلي: وبعدين حلها ايه عندك؟
ادهم: انك تسمعي كلام ابوكي وتبعدي عني نهائي
ليلي: يا سلام وده حل؟؟؟
ادهم: ده الصح
ليلي: انت كده ليه؟ هو انا ما اعنيلكش اي حاجه نهائي؟؟؟ هتفضل ترخص فيا لحد امتي؟؟؟
ادهم: انا؟؟؟؟ انا برخصك؟؟؟؟ انا لو برخصك هقولك طنشي ابوكي وتعاليلي كل يوم لكن علشان انتي مش رخيصه فبقولك اسمعي كلامه وما تخسرهوش ابدا
ليلي: مش هخسره
ادهم: لو عاندتيه هتخسريه
ليلي: وانا مش هبعد عنك ومش هسمحلك تبعدني انا اكتر واحده في الدنيا بكره التضحيات في الحب بحس انها غباء اتنين يحبوا بعض ويضحو علشان بعض وقال ايه بيضحي علشان سعاده حبيبه ماهو حبيبه عمره ما هيكون مبسوط او سعيد من غيره
ادهم: ولا هيكون مبسوط مع حبيبه لو خسرتي ابوكي بسببي عمرك ما هتكوني مبسوطه معايا فاشتري ابوكي ورضاه
ليلي: ممكن مالكش دعوه بابويا ممكن تخلينا في حالنا دلوقتي وسيب ابويا
ادهم: انا مش موافقك ومش عارف ايه اللي في دماغك عايزه توصليله
ليلي: عايزه اوصلك انت كل ده مفهمتش يا ادهم عايزه اقرب اكتر
ادهم: وبعد ما تقربيلي هاه هتعملي ايه؟؟؟ فوقي بقي واختاري حد يناسبك
ليلي: ادهم انا…
قاطعها: انا سمعتك للاخر ودلوقتي بعد اذنك ارجعي لاصحابك ومتكدبيش علي ابوكي بسببي
سابها ومشي وهيا دموعها نزلت كانت متخيله انه هياخدها في حضنه ويضمها بس شكلها بتحلم كتير
راحت لاصحابها وروحوا وفي البيت مني فضلت معاها
مني: مش هتقوليلي مالك وزعلانه ليه؟؟
ليلي: مرضيش يسمعني او سمعني بس سابني
مني: طب كويس واحد فيكم بيفهم
ليلي: انتي بتقولي ايه؟ مني ادهم بالنسبالي بقي…..
مني: بقي ايه هاه؟ فوقي بقي
ليلي: انتي هتعملي زيه وتقوليلي فوقي
مني: لانه هو واقعي وشكلي كده هبدا احترمه
ليلي: انا بحبه يا مني بحبه
مني: انتي بس مهووسه بحاجه جديده وبكره تنسيه وتنسي اسمه اصلا
ليلي: تعرفيني من كام سنه؟ امتي كنت من النوع اللي بتهوس في حاجه او بتعلق بيها او بغير رايي بعد شويه؟؟؟؟
مني: عمرك
ليلي: بالظبط عمري. طول عمري ببقي عارفه عايزه ايه وانا عايزاه وبحبه ومعرفش ليه
لما ببصله مش بشوف الجروح دي بتبقي حاجه باهته كده بشوفه هوه ببقي نفسي ارمي نفسي في حضنه واقوله خليني ديما في حضنك ومتبعدنيش ابدا بس هو عمال يحسبها ابويا.. الناس.. الكل هيرفض
مني : هو اتعود يكون واقعي فبيتكلم بواقعيه
ليلي: وانا وراه ومش هسيبه غير لما يسلم
ادهم روح وعمال يلوم نفسه انه سابها ويرجع يقول لا كده صح وحرب جواه ملهاش اول من اخر واخيرا نام ورجع لكوابيسه
صبري اتنرفز قوي من سكوته ده وراح ضاربه بالقلم لدرجه ان ادهم كان هيوقع من قوته
صبري: اطلع بره بيتي بره
ولسه ادهم هيخرج بره البيت قابله مصطفي داخل
مصطفي: ايه رايح فين؟ هتخرج اخيرا هتخرج تعال وانا هخرجك
صبري: سيبه يا مصطفي يمشي
مصطفي: يمشي؟؟ يمشي فين؟؟؟ ادهم بصلي هنا
ادهم بصله
ادهم: خلاص مالوش لازمه الكلام
مصطفي: ايه الدم اللي في بقك ده؟؟
ادهم مسح الدم اللي نزل من قوة القلم واداله ظهره وهيكمل طريقه
مصطفي: مش هتمشي غير لما افهم في ايه
ساره: الباشا لقينا في اوضته دول
وورته المجلات
مصطفي مسكهم وعرف ان دول بتوعه
مصطفي: وبعدين ايه المشكله؟؟
صبري: يعني ايه ايه المشكله هاه؟ انا بيتي تدخله حاجات زي دي؟
مصطفي: وعلشان كده مديت ايدك عليه وضـ,ـربته؟؟؟ مسالتش نفسك جابهم منين؟ امتي شوفته خرج بره البيت هاه؟ ولا امتي حد فيكم عطاله فلوس يشتري بيها حاجه؟ ردوا عليا
صبري سكت هو فعلا مفكرش كده نهائي
مصطفي: وانت يا سي ادهم ما اتكلمتش ليه؟
ادهم: كنت عايزني اقول ايه؟
مصطفي: تقول اللي حصل تقول ان انا اللي جبت المجلات دي وانهم بتوعي
صبري وساره اتفاجؤا
ساره: انت بس بتقول كده علشانه؟
مصطفى: ليه مشفتيش معايا مجلات زي دي وانا في سنه؟؟؟ ولا نسيتي
متبصليش كده يا بابا ايوه حاولت اخرجه يسهر معايا او اعرفه علي بنات بس هو رفض وفي الاخر جبتله المجلات دي علشان يحس انه شاب طبيعي ما ارتكبش جريمه يعني وبرضه رفض المجلات وانا سيبتهاله غصب عنه في اوضته
انا اسف يا ادهم علي المشكله اللي سببتهالك بس انت كان المفروض تدافع عن نفسك
ادهم: ادافع عن نفسي واتهمك انت؟ انت جميلك انت ووالدك عمري ما هنساه عايزني ارد الجميل باني أسوأ صورتك قدام باباك ومامتك؟ ده الصح؟ وبعدين حتي لو قلت هما كانوا هيصدقوني؟؟ هما مستنين مني غلطه علشان يطردوني وانا عارف ان وجودي مش مرغوب فيه فهفرض نفسي ليه؟؟
صبري: لا لا لا متقولش كده انت مش فارض نفسك انا اتبنيتك بارادتي محدش فرض عليا ده ولما اخدت القرار ده اخدته انا محدش عرف بيه لا مصطفي ولا مراتي وانا مسؤل عنك لحد ما تتخرج وتقف علي رجليك وسامحني اني اتهمتك سامحني انا اسف
ادهم: لا العفو حضرتك اكبر من انك تعتذرلي
صبري: طيب اطلع بقي اوضتك ولو سمحت ياريت تدافع عن حقك وطالما ليك حق خده متتنازلش عنه
صحي ادهم من ذكرياته اللي عايش فيها مش عارف يخرج منها زي ما تكون ذكرياته دوامه بلعاه ولا عارف يخرج ولا بيمـ,ـوت ويرتاح
تاني يوم اخر النهار وليلي خارجه من المدرسه من حصص التقويه اخر النهار لمحت ماكس ماشي ندهتله وهو راحلها
ليلي: وحشتني ياتري صاحبك فين؟؟؟
بصلها وانتبه
ليلي: انت فاهمني؟؟؟
الظاهر اني اتجننت وبتكلم مع بكلب
لو فاهمني خدني عند ادهم فاهم ادهم
هز الكلب ديله ومشي كام خطوه وبصلها
ليلي: ايه مش فاهمه انت هتاخدني؟؟
رجع الكلب ليها وشدها من هدومها
وهيا مشيت معاه
دخل وسط الشجر اترددت وخافت لانها جبانه جدا والنهار في اخره وشويه والشمس هتغيب افرض الكلب جري منها ترجع ازاي؟؟
وقفت متردده والكلب مستنيها وفي الاخر حسمت ترددها ومشيت وراه ومسكت ديله علشان ميبعدش عنها
واخيرا لمحته قاعد بعيد وساند علي شجره ومديها ظهره
ادهم: اخيرا ظهرت يا ماكس
ما اخدش باله من ليلي اللي وقفت مكانها تبصله من بعيد
واخيرا نطقت
ليلي: ديما بتختار مكان بعيد وتقعد فيه
ادهم اتفاجئ بصوتها وقام وقف وبصلها نظره طويله وبيفكر جديا يجري ياخدها في حضنه او يخطفها من البلد دي خالص واخيرا عرف ينطق
ادهم: انتي بتعملي ايه هنا؟
ليلي: وحشتني قلت اجي اشوفك فماكس جبني
ادهم: اممم وبعدين
ليلي: بس يا سيدي قلتله ما ينفعش الكلام ده بس هو اصر
ادهم ضحك وهيا ضحكت
ليلي: ايوه كده محدش واخد منها حاجه
ادهم رجع قعد مكانه وهيا جت وقعدت قصاده
ادهم: ولو حد شافك وقال لابوكي؟
ليلي: سيبك من ابويا دلوقتي
ادهم: وبعدين؟؟
ليلي: مكنتش اعرف انك جبان قوي كده؟
ادهم: جبا…. جبان ايه؟ انتي متخيله اني خايف من ابوكي او اهل البلد دي كلها؟ انا خايف عليكي انتي مش عايزك تتخانقي معاه او تزعلو من بعض بسببي
ليلي: ولو اتخانقنا بسببك فيها ايه؟؟
ادهم: مش عايز ده انتي متعرفيش قيمه الاب ومعشتيش من غيره فحاسه انه عادي انك تزعليه بس لو جربتي الحرمان مكنتيش قولتي كده
ليلي: عارفه يا ادهم قيمه الاب كويس بس ده ما يمنعش اني يكون ليا حياه خاصه
ادهم: اختاري حد مناسب ليكي
ليلي: القلب اللي بيختار مش احنا
قربت منه قوي ومسكت وشه باديها الاتنين
وهو قلبه كان هيقف من قربها ده
ليلي: ادهم حاول توقف عقلك شويه مش كل حاجه بتتحسب بالعقل فكر بده واديله فرصه يدق
حطت ايدها علي قلبه
ادهم: انا معنديش قلب علشان يدق
ليلي: بجد؟؟ هتاكد بنفسي
وحطت راسها علي صدره واخيرا جت اللحظه اللي بتتمناها واتمنت لو تفضل كده علي طول او هو يضمها باديه او هيا تلف ايديها حواليه بس حاليا اكتفت بكده وهو قلبه مش كان بيدق قلبه كان هيخرج من مكانه ومعرفش يتحكم في انفعالاته
ليلي: امم فعلا انت معندكش قلب خالص
ادهم: ليلي انا ما انفعش
ليلي: وليه متنفعش؟ ومتقولش ابوكي
ادهم: بعيد عن ابوكي انا معرفش اصلا يعني ايه حب وعمري ما حبيت ولا اتحبيت قبل كده وعايش في عزله انا راضي بيها لكن لو حبيت وجربت الحب وجربت الاهتمام من حد وبعدها ارجع لوح
الحلقه السابعه والثامنه والتاسعه والعاشرة والحادية عشر
الحلقة السابعة
استمرت مقابلات ادهم وليلي في السر وتقريبا ليلي عرفت كل حاجه عن ادهم
حكالها عن ابوه ورفضه ليه وامه وموقفها السلبي منه ديما واخوه وكرهه ليه واخته الوحيده اللي حبته
حكالها ازاي عمر ما ابوه شاله او باسه او قاله كلمه كويسه بالعكس كان ديما يهد فيه حتي لما كان ينجح مثلا في المدرسه بيتنرفز عليه اما احمد علي الرغم انه كان ضعيف الي انه لو نجح بس كان يعمله حفله
كان ديما مضطهد ومش عارف سبب للاضطهاد ده وحكالها عن ابوه لما جلده وخرجه من المدرسه وان رد فعل امه انها من ساعتها بطلت تكلمه نهائي وليلي استغربت ازاي ام تقاطع عيل عمره عشر سنين وتفضل خمس سنين كامله ما تكلمهوش وازاي تقبل كل ده
حكالها عن الحادثه واللي حصله في المستشفي وكل الظروف وازاي ربنا بعتله مصطفي ده علشان يخلصه بس كرهت مصطفي علشان الجرح الطويل اللي في ايد ادهم بس قالها انه لولا الجرح ده الله اعلم كان هيحصله ايه
حكالها عن رفض ساره ام مصطفي ليه
سالته لما دخل الكليه كان بيقضي اجازاته ازاي
قالها انه كان بينضم لمعسكرات تبع الكليه وبيستمر فيها وبدأ يدرب كونغفو وكارتيه وتايكوندو وبدأ يدرس لغات وكان بيروح البيت في اوقات بسيطه جدا
سألته امتي ساب البيت
قالها في اخر سنه ليه في الكليه مصطفي كان خطب وهيتجوز بس خطيبته اتخانقت معاه بسبب ادهم لان مصطفي كان عايز يقعد مع ابوه وامه وهيا وافقت بس رفضت نهائي وجود ادهم
وهنا طلب من صبري انه يساعده في انه يشوف شقه صغيره ايجارها بسيط يقعد فيها
وفعلا صبري كان عنده شقه صغيره خلي ادهم يقعد فيها لحد ما يستلم شغله ويقف علي
رجله وبعد كده استقل بحياته
وفي شغله وضعه اختلف مع كل نجاح في مهمه كان بيكسب احترام الكل وخوف الجداد وحاليا الغموض مغلفه محدش ابدا يعرف عنه حاجه وسمعته انه مبيرحمش ابدا لانه جد جدا في شغله ومبيهزرش ولا عنده اصحاب فالكل بيعمله الف حساب
علاقته اتقطعت نهائي باهله ومازلت مستمره مع صبري ومصطفي بس في اضيق الحدود
ليلي كانت مع ادهم وكالعاده ادهم معاها بيكون انسان تاني
ليلي: وبعدين يا ادهم هنفضل كده لحد امتي؟
ادهم: لو مش عايزه تقابليني …..
قاطعته ليلي وحطت ايدها علي بقه علشان ميكملش
ليلي: اوعي تكمل.. اوعي تقول اني مش عايزه اقابلك.. انا عايزه اكتر من اني اقابلك. عايزه افضل معاك علي طول مش عايزه اسيبك ابدا ولا عايزه ابعد عنك عايزه انام واصحي في حضنك فاهم؟؟؟؟
ادهم: وده نفس اللي انا عايزه يا ليلي؟؟
ليلي: طيب وبعدين؟؟؟
ادهم: وبعدين ايه؟؟؟ مش فاهمك
ليلي: ادهم ممكن أسألك سؤال غريب؟؟؟؟
مسك ايدها وباسها
ادهم: اسالي يا حبيبه قلبي في اي شيئ
ليلي بتردد: انت ليه عمرك…
ادهم: عمري ايه كملي
ليلي: ليه عمرك ما حاولت تبوسني ابدا؟؟؟
ادهم ساب ايدها وبص للارض وبيدور علي اجابه يقولها
ادهم: انتي عايزاني ابوسك؟؟؟؟
ليلي: ما تجاوبش علي سؤالي بسؤال
ادهم وقف واداها ضهره وبعد عنها شويه
وهيا راحتله ووقفت قدامه
ليلي: ماتهربش مني
ادهم: مش بهرب منك انا بس مش عارف اقولك ايه
ليلي: انت بتحبني صح؟؟
ادهم: انا تخطيت الحب من زمان انا بعشقك يا ليلي مش بحبك
ليلي : وعايزني افضل جنبك صح؟؟
ادهم: طبعا انتي بتسالي اسئله غريبه قوي
ليلي: طيب مستني ايه؟؟؟
ادهم: ليلي انا مش فاهمك خالص ومش عارف انتي عايزه توصلي لايه وسبق وقولتلك اني لاعمري حبيت قبلك ولا اتحبيت وكل اللي بيحصلي وبعيشه معاكي جديد عليا
ليلي: يعني ايه؟؟؟
ادهم: يعني متتوقعيش مني تصرف معين ومتستنيش اني افاجئك بحاجه رومانسيه او اعمل حاجه من الاخر متتوقعيش مني
اللي انتي عايزاني اعمله اطلبيه او عرفيني انتي مستنيه ايه
عارف ان ده مش حاجه حلوه وممله انك تكوني مرتبطه بواحد مش عارف مطلوب منه ايه بس معلش استحمليني انا حكتلك كل ظروفي علشان تفهميني… فاهماني؟؟؟
ليلي: فهماك ومقدره كل ظروفك وبحبك بالرغم من كل ده
ادهم: يبقي قوليلي صراحه بتلفي وتدوري علي ايه؟؟؟
ليلي: عايزه….. عايزه… عايزاك يعني….
ادهم: عايزه عايزه وبعدين قولي علي طول
ليلي: عايزه افضل معاك علي طول
ادهم: والمطلوب مني ايه؟
ليلي: نتجوز يا ادهم اديني قولتها صراحه اهوه عايزه نتجوز
ادهم اتصدم ده كان اخر شيئ بيفكر فيه حاليا الجواز عمره ما كان في حساباته ابدا
وليلي كمان اتصدمت من رد فعله ده ودموعها اتجمعت في عنيها
ليلي: مكنتش متخيله انك هتتصدم كده..
ادهم: مش حكايه صدمه الحكايه اني مفكرتش اني ممكن اتجوز في يوم
ليلي: امال تخيلت ايه هتسلي بيها طول ما انا في بلدهم وبعدها اسافر وهيا تولع ولا ايه؟؟؟
الظاهر اني حكمت عليك غلط بعد اذنك
ولسه هتمشي مسكها من ايديها الاتنين
ادهم: انا عمري ما اتسليت بيكي وانتي عارفه كده كويس وعمري ما تخطيت اي حدود معاكي ومفيش اي شيئ عملناه مع بعض يخليكي تخجلي او تندمي انك معايا
ليلي: كده انا عرفت ليه عمرك ما حاولت تبوسني او تقرب مني حتي لما كنت بحاول اقرب كنت بتحط حد بينا علشان لما تيجي تمشي تقولي انا ما لمستش شعره منك ومش مديونلك بحاجه
ادهم: ايه اللي بتقوليه ده؟ فجاه انا بقيت انسان اناني للدرجه دي انا بحبك وانتي عارفه ده كويس واكيد حسيتيه
ليلي: اللي بيحب حد بيبقي عايزه جنبه علي طول
ادهم: وانا مش عايزك جنبي في كل لحظه وثانيه كمان؟؟؟؟ انتي خليتيني لاول مره احس اني انسان واعيش واني من حقي اتنفس زي الناس انا كنت اقتنعت اني مسخ زي ما بيسموني واني سفاح ومعنديش قلب واكتشفت اني عندي قلب بيحب وبيدق زي كل الناس انتي خليتيني لاول مره اعيش ولاول مره احب واتحب
ليلي: وعلشان كده عايز تسيبني؟؟؟
ادهم: انا عايز اسيبك؟؟؟؟؟ انا عايز افضل جنبك لاطول فتره ممكنه عايزك معايا
ليلي: وعلشان عايزني معاك مش عايز تتجوزني؟؟؟ بجد انا مش فاهماك انت بتفكر ازاي؟ بتحبني بس من بعيد لبعيد
ادهم: انتي متخيله اني عمري ما حلمت انك تكوني شريكه حياتي واننا نعيش ونكبر مع بعض واني اعيش عمري في حضنك؟؟؟
ليلي: ولما انت حلمت بده اتصدمت ليه لما قلتلك نتجوز؟؟؟
ادهم: لانك كده بتنهي الحلم الجميل اللي انا عايشه وهتصحيني علي كابوس الواقع
ليلي: قصدك ايه؟؟؟جوازك مني هيكون كابوس؟؟؟
ادهم: جوازي منك ده هيكون اجمل شيئ ممكن يحصلي؟؟؟
ليلي: امال ليه بتقول هصحيك من الحلم؟؟؟
ادهم: انتي بجد مش فاهمه؟؟؟؟
ليلي: مش فاهمه اي حاجه
ادهم: في اللحظه اللي هتفتحي فيها سيره الجواز هتنتهي علاقتي بيكي وده اللي انا خايف منه
ليلي: يعني ايه؟؟
ادهم: يعني مين هيسمحلنا نتجوز هاه؟؟؟؟ ابوكي هيوافق؟؟؟ عيلتك هتوافق؟؟؟ مجتمعك ده هيوافق؟؟؟؟
ليلي: طظ فيهم كلهم ميهمنيش حد غيرك
ادهم ضحك بحزن
ادهم: هتقاطعيهم علشاني؟؟؟؟
ليلي: هقاطع الدنيا كلها وكفايه انت
ابتسم ادهم بحزن
ادهم: وكفايه عليا قوي اني اسمع الكلام ده منك
ليلي: انت ليه مفترض انهم هيرفضوا؟؟؟
ادهم: ابوكي مش بيطقني ادافع عن بلده هيوافق عليا جوز بنته
ليلي: انا هقنعه
ادهم: مش هيقتنع ومش هيوافق
ليلي: انا وراه لحد ما يوافق انت مش متخيل هو بيحبني قد ايه
ادهم: لا انا عارف انه بيحبك وعلشان بيحبك عمره ما هيوافق ابدا ابدا… عمره ما هيوافق يجوز بنته لواحد شايفه شيطان او مسخ
ابوكي قال ان ابليس لو شافني يستعيذ مني متخيله ده فهل ممكن يجوز بنته لشخص شايفه أسوأ من ابليس نفسه؟؟؟
ليلي: هخليه يشوفك زيي ما انا شايفاك يشوفك بعيوني
ادهم: مش هيسمعك … ابويا نفسه معرفش يشوفني هو هيشوفني؟؟؟
ليلي: هتجوز غصب عنه واخليه يوافق غصب
ادهم: وعلي اساس اني وافقت نفترض انه اتبري منك وطردك من بيتك وعيلتك هجرتك بسبب خروجك عن طوعه،؟؟؟؟
ليلي: هتكون انت معايا وده اللي يهمني
ادهم: وانتي متخيله اني ممكن اتجوزك بالطريقه دي؟؟؟؟ واكون سبب طردك من بيتك
ليلي: لو بتحبني ايوه؟؟؟
ادهم: لو بحبك؟؟؟؟ علشان بحبك عمري ماهرضي ابدا بده ولاني عارف طعم الطرد من البيت عمري ماهرضي ابدا تدوقيه انتي مش عارفه قد ايه بتوجع انك تتطردي من بيتك وتتكرهي من اقرب الناس ليكي وانك تتمني بس حضن او حتي مجرد كلمه
انا كان اقصي امل ليا ولحد دلوقتي اسمع من امي كلمه واحده يا ليلي تخيلي اقصي امنياتي اسمعها تقولي كلمه
انت عارفه انا لحد دلوقتي بغيب واكلمها في التليفون علشان اسمع منها بس كلمه الووو لانها مبتقولش غيرها وبعد ما بتعرف انه انا بتسكت تخيلي تكون اقصي امنياتك كلمه؟؟؟ عمري ماهرضي ابدا اعيشك ده
ليلي: انت ناسي انك هتكون جنبي؟؟؟
ادهم: مش هعوضك ابدا عنهم وخصوصا ان انتي جربتي حضنهم وخوفهم وحنانهم فهتفتقديه وبعدها مع الوقت هتكرهي اللي بعدك عنهم
ليلي: يعني انا مش معوضاك عنهم؟؟
ادهم: علي الرغم من اني عمري ما دقت طعم حضنهم الي اني بتمناه ايوه انتي مليتي حياتي وعوضتيني عن كتير وغيرتيني بس برضه بتمني حضنها ولو بس مره
ليلي: يبقي خلاص نفضل وراهم لحد ما يقتنعوا وهيقتنعوا بس المهم ان انت متتخلاش عني
ادهم: انا عمري ما هبطل احبك ابدا وده وعد مني
ليلي: صدق الوعد ده
ادهم: اصدقه ازاي؟؟؟؟
ليلي: انك تبوسني زي اي عاشق بيبوس معشوقته
ادهم بعد عنها وعطاها ضهره وبص للارض
ليلي: ممكن اعرف انت بتفكر في ايه بالظبط وليه رافض ده؟ المفروض انك تتمني ده؟؟؟
ادهم: وانا بتمناه في كل لحظه
ليلي: وانا بقولك اهوه انا ملكك
ادهم: ياريت
ليلي: ادهم حبيبي( مسكت وشه بايديها) بتفكر في إيه؟
ادهم: اقولك بفكر في ايه وما تزعليش؟؟؟
ليلي: قول ومش هزعل
ادهم: مش عايز ابوسك علي الرغم اني ممكن ادفع حياتي تمن لده بس مش عايز لاني مش عايزك يجي يوم تتجوزي فيه وجوزك ما يكونش اول راجل باسك
ليلي ودموعها نازله: انت هتكون جوزي واول
راجل تبوسني واخر راجل فاهم
ادهم: مش هنضحك علي بعض…. انا عمري ما هكون جوزك وجوزك من حقه انه يكون اول راجل يلمسك
ليلي: انت هتكون جوزي والنهارده هكلم ابويا وهقوله وهتيجي تتطلبني منه فاهم؟؟؟
ادهم مسك وشها بايديه وبيبصله زي ما تكون دي اخر مره هيشوفها عايز يحفر ملامحها جواه
ادهم: يبقي النهارده اخر يوم هشوفك فيه عرفتي ليه اتصدمت لما قولتي نتجوز لاني عارف ان ده هيكون بدايه النهايه
ليلي ودموعها مغرقه وشها
ليلي: مش اخر مره وهتشوف بس انت ما تهربش بس
ادهم ضمها لحضنه وهيا عيطت بصوتها كله في حضنه وهو دموعه نزلت غصب كان نفسه الحلم يطول شويه بس كل حلم مهما يطول لازم يخلص
ادهم: انتي اتاخرتي
ليلي: مش مهم…. انا بحبك قوي يا ادهم
ادهم: وانا يا ليلي بحبك فوق ما تتخيلي
ليلي: يبقي حققلي اللي بتمناه عايزه ادوق طعم اول بوسه في حياتي من حبيبي حتي لو مش هنتجوز عايزاها منك انت
ادهم: انتي مش قلتي اننا هنتجوز يبقي لما نتجوز يالا علشان اروحك
ومسك ايدها وبدؤا يمشوا وهو في حرب جواه
لحد ما وصلو لاخر مكان ينفع يمشي معاها فيه
ادهم: هستني تليفونك تتطمنيني عملتي ايه ولو ما اتصلتيش هفهم اللي حصل
ليلي: هتصل واحدد معاك معاد تيجي البيت
ادهم ابتسملها لاحلامها الورديه
وساب ايدها ومشيت خطوه وقلبه بيصرخ متسبهاش تمشي مش هتشوفها تاني مش هتشوفها تاني مش هتشوفها تاني
ادهم: ليلي
جري عليها وباسها ملعون اي حاجه تانيه.. فى داهيه اي اعتبارات.. ده من حقه وهيا حبيبته علي الاقل تفضله الذكريات يعيش عليها
اديها حواليه وهو ضاممها وبوستهم كانت طويله جميله انفاسهم اتقطعت بس محدش فيهم قادر يبعد عن التاني كل واحد خايف ان دي فعلا تكون اخر مره ليهم مع بعض
واخيرا بعدوا عن بعض وكل واحد حس ان روحه اتسحبت لما بعدوا زي ما يكونو عايزين يفضلوا كده العمر كله
سند دماغه علي دماغها وهيا لسه بين ايديه وانفاسهم مقطوعه ونفسهم عالي محدش قادر يتكلم او ينطق
ليلي رفعت راسها شويه وباسته تاني وهو بادلها البوسه بس المره دي كانت هاديه مش عنيفه وفضل يبوس فيها ومش عارف يوقف نفسه او يسيطر على اعصابه من تاني وهيا متعلقه في رقبته زي الغريق اللي بيتعلق في اللي بينجده واخيرا بعد عنها
ادهم: امشي
ليلي: هشوفك تاني؟؟؟
ادهم: اتمني
ليلي: بحبك وهفضل احبك
ابتسم وسابها تمشي وقلبه نبضاته بتهدي واحده واحده وهيا بتبعد عن عنيه وتختفي من قدامه وعرف من جواه ان حلمه الجميل خلص ولازم يرجع للواقع بس واقعه قبل كده مكنش فيه حب دلوقتي واقعه المرير هيتضافله عذاب جديد وجرح
كان عارف من اول لحظه ان ليلي هتكون اكبر جروحه بس مش ندمان علي الاقل جرب طعم ان حد يحبه ولو لفتره بسيطه بس جرب…….
ليلي روحت وهيا اعصابها كلها مهزوزه اجمل لحظات عاشتها في حضنه بس خايفه ليكون عنده حق وتكون دي نهاية حبهم
لا ابوها عمره ما رفضلها طلب وهيسمعها
وبالليل ابوها كان قاعد وبيضحك وبهزر وقالت فرصه تتكلم معاه وهو هادي
قعدت وخلت اخوتها يفضولها الجو
قعدت هيا وابوها وامها
ابوها حس انها مش علي بعضها ومتلخبطه
محمود: مالك يا قلب ابوكي مش علي بعضك ليه؟؟؟
ليلي: لا ابدا بس كنت عايزه اكلمك في موضوع كده
ليلي ايديها في حجرها بتفركهم والتوتر باين عليها قوي وابوها فهم ان الموضوع فيه راجل وفرح لان اخيرا بنته المفضله هتتجوز لانها ديما بترفض اي حد يتقدم
محمود: مين هوه؟؟؟
ليلي ارتبكت: مين هوه ايه؟؟؟؟
محمود: سعيد الحظ اللي مخليكي مش علي بعضك… اخيرا حد دخل دماغك قولي يالا بقي متشوقنيش اكتر من كده
ليلي: هو انسان كويس بس انت اديله فرصه تعرفه وقرب منه وساعتها هتعرف قد ايه هو كويس
محمود: يا حبيبتي طالما انتي اخترتيه لازم يكون كويس طول عمرك عاقله وبتوزني امورك صح وعمري ما شكيت في اختياراتك قبل كده
ليلي: يعني انت عارف اهوه اني بختار صح واني مش متهوره وعاقله؟؟؟
محمود: ايوه يا بنتي عارف ده… قلقتيني بقي علي العموم لو هو فقير يعني عادي ما احنا ناس عاديين وعلي قد حالنا وعمري ما حكمت علي حد بفقره او غناه
ليلي: مش حكايه غني وفقير لأ
محمود: وبعدين بقي قولي بقي هو مين ومتحيرنيش معاكي
ليلي: هو يبقي يبقي يبقي..،
محمود: متنطقي يا بنتي
ليلي: يبقي ادهم صبري ظابط المخابرات اللي هنا في البلد
وهنا بقي ابوها…………،
الحلقة الثامنة
ليلي قالت لابوها ان ادهم هو العريس المنتظر واستنت رد فعل ابوها
لحظه طويله من الصمت عدت زي ما يكون ابوها مش مستوعب كلامها واخيرا قدر ينطق
عم محمود: افندم؟؟ انتي قلتي مين؟؟؟
ليلي: حضرتك سمعتني كويس
محمود: لا ما سمعتش!! لان ما ينفعش اسمع ده
ما ينفعش بنتي العاقله الرزينه تكون اتجننت
( علي صوته جدا في اخر كلمه وبدا جنونه يطلع عليها)
محمود: ادهم مين ده هاه؟؟؟ المشوه المسخ؟؟ طيب تيجي ازاي دي؟؟ طب نعقلها ازاي؟؟؟ انتي اتجننتي؟؟؟
ليلي: ايه عيبه؟؟؟
محمود: ايه عيبه؟؟ انتي فعلا اتجننتي او اتعميتي لكن استحاله تكوني طبيعيه؟؟؟
ليلي: اتجننت لمجرد اني عرفته كانسان ومحكمتش زيكم علي شكله؟؟؟
محمود: ايوه اتجننتي واتجننتي رسمي كمان
تعرفي ايه عنه؟؟؟ مين هو؟ جاي منين؟؟ ايه اللي شوهه كده؟؟؟ هاه ردي
ليلي كانت تعرف كل حاجه عن ادهم بس متقدرش تقول لابوها اي حاجه
ليلي: اللي اعرفه عنه مكفيني
محمود: مكفيكي؟ اممم مكفيكي؟؟؟ طيب بما انك بقيتي مجنونه رسمي فمعدش ليكي اي حق تاخدي قرار بنفسك
من هنا ورايح مفيش خروج من البيت ابدا
والبني ادم ده انا هعرف اوقفه ازاي عند حده
ليلي: قصدك ايه؟؟؟ بابا استني اسمعني
جريت ورا ابوها وهو خارج
محمود: سمعت جنون كفايه
ليلي: انا بحبه اسمعني
محمود: بكره تفوقي من وهمك ده
زقها بعيد لما حاولت توقفه وسابها وخرج
وهي فضلت تعيط وفهمت قصد ادهم لما قالها انه كان نفسه بس حلمه يطول شويه وعرفت ان الطريق هيكون طويل ان مكنش مستحيل
عم محمود خرج زي المجنون عايز بس يطول رقبه ادهم ونفسه لو يقـ,ـتله
خرج مش شايف قدامه وقابل مدير الشرطه والعمده كانو جايين عنده بس سابهم ومشي في وشهه وهما نادو عليه مردش
ومشيوا وراه لما لقوه رايح ناحيه مكان ادهم وعرفو ان في حاجه حصلت
حاولو يهدوه بس مكنش بيرد عليهم لحد ما وصل وهناك زي المجنون بينادي علي ادهم
محمود: ادهم ادهم اخرج هنا اخرج لو كنت راجل
ادهم اول ما سمع صوته غمض عنيه لانه كان مستني مجيته دي بس مش بالسرعه دي
كان عنده امل ان ليلي تستني شويه او يشوفها مره تانيه حتي.. بس كل اماله انهارت وعرف ان ده وقت الصحيان من الحلم
قام وخرج واول ما خرج هجم عليه محمود ومسكه من هدومه وبدا يزعق ويهز فيه وادهم ساكت تماما ومستسلم نهائي
محمود: انت اتجننت؟ اكيد طبعا اتجننت ولا نسيت نفسك ولا ايه بالظبط هاه!؟ انت مين انت علشان تبص لبنتي هاه؟؟ انت ابليس نفسه يستعيذ منك عايز تبص لملاك زي بنتي؟؟؟ انت ايه؟؟؟
العمده والمدير بيحاولو يبعدوه عنه واخيرا قدرو يشدوه
المدير: اهدي يا عم محمود الكلام مش كده
محمود: وهو خلي فيها كلام
العمده: صلي علي النبي كده واهدي وفهمنا في ايه لده كله
محمود: عليه الصلاة والسلام… المجنون ده بيبص لبنتي
العمده: يعني ايه يبصلها؟؟
محمود: يعني اتجنن وعايز يتجوزها؟؟؟
كلهم سكتوا واتصدموا وادهم واقف وساكت مش بيتكلم او يرد
العمده: ايه؟ يتجوز ليلي بنتك؟؟؟
الكل استكترها عليه زي ما تكون جريمه انه بص لوحده وعايز يتجوزها
محمود: ايوه شفت الجنان؟؟ المسخ ده عايز يرتبط ببنتي انا؟؟؟ بليلي اللي تلات اربع شباب البلد هيتجننوا عليها في الاخر المسخ ده عايزها شوفتو بقي؟؟؟ يبقي من حقي اقـ,ـتله واشرب من دمه كمان ولا لأ؟؟؟
المدير: اهدي يا عم محمود اهدي… سياده المقدم هو الكلام ده صح؟؟
ادهم :::………..
عم محمود: ايوه صح وانت لسه مستنيه يتكلم؟؟ هيقول ايه؟؟؟
ادهم: ايه الغلط اللي ارتكبته مضايق حضرتك قوي كده؟ ؟ اني حبيت بنتك؟
عم محمود: اخرس… اوعي تتكلم عن بنتي.. اوعي اسمها يجي علي لسانك ولا حتي طيفها يجي في خيالك نجوم السما اقربلك منها انت فاهم؟؟؟
أدهم: وليه؟؟
محمود: ليه!؟؟؟ انت بتسال ليه؟؟؟ انت مين انت؟؟ مين اصلك وفصلك؟؟ ولا علشان ظابط فاكرنا هنخاف؟؟؟ انت نسيت نفسك؟؟ بص لنفسك في مرايه وانت تشوف نفسك علي حقيقتك لاحسن تكون نسيت شكلك
ادهم: منسيتش شكلي ولا حاجه بس من امتي بيتحكم علي الراجل بشكله؟؟ انت متعرفنيش
محمود: ولا عايز اعرفك ولا عايز اشوف وشك المشوه ده في البلد دي كلها ما بالك ببيتي
المدير: مقدم ادهم حضرتك جيت البلد دي لمهمه معينه لو سمحت التزم بيها انت مش جاي هنا تحب
محمود: يغور بره البلد كلها
المدير: يكمل مهمته اللي جايلها الاول
سياده المقدم احنا هنا معندناش بنات في البلد دي للجواز فالتزم بمهتمك وبس
ادهم كلامهم كان بيجرحه وبيوجعه كل ده ليه يعني؟؟؟ ايه الغلط اللي ارتكبه؟؟؟؟
ادهم: حضراتكم جايين هنا وبتتخانقو… هو انا امتي كنت طلبت ايد حد من بنات البلد دي؟؟؟
كلهم بصو لمحمود:
المدير: هو طلب ايد ليلي؟؟
محمود: لا بس
ادهم قاطعه: يبقي لما اجي لحضرتك واطلبها ابقي تعال اتخانق معايا.. وبعدين اوعو تنسو انا هنا في البلد دي ليه وجاي ليه… وممكن اسيبها وامشي حالا بس انا هنا علشان في ناس فعلا محتاجه وجودي هنا وعلشان الحق ياخد مجراه فمتنسوش انتو ده… ولو كنت ساكت لحضرتك ومش برد عليك فده احترام ليك مش اكتر فياريت متفهمش سكوتي ده غلط ولما اجي اخبط علي بابك متبقاش تفتحلي…. بعد اذنكم
سابهم ومشي وعم محمود هيولع ورجع بيته كمل خناقه مع ليلي وقالها انه لو اخر واحد في الكون عمرها ما هتتجوزه ابدا
ادهم كان عارف ان هو ده اللي هيحصل بمجرد ما تتفتح سيره الجواز بس مكنش ينفع يقولها لأ مكنش بايده حاجه يعملها
الحياه رجعت صعبه تاني ويمكن اصعب قبل كده مكنش يعرف يعني ايه حب او اهتمام او ان حد يخاف او يسأل عليه. لكن دلوقتي جرب وداق طعم الحب ومفتقده ومستعد لو يدفع حياته ويلمحها حتي ولو من بعيد
كان ممكن يمشي من البلد خالص ويبعت اي حد مكانه وكان ممكن يوقف عم محمود او اي حد يضايقه عند حده بس مقدرش
دلوقتي بقي عنده قلب بيدق وبيتحكم في تصرفاته وبيعانده كمان
ده غير وعده لليلي انه مش هيهرب من البلد او يمشي
فضل كل يوم بيمشط البلد ومستني اي حاجه تحصل
وفي يوم وهو ماشي سمع دوشه وناس بتصرخ جري يشوف في ايه
كانت مطحنه الفلاحين بيطحنو فيها القمح وماكنه الطحين بتلف وتدور وتتطحن القمح
دخل شاف الماكنه شغاله وماسكه عيل صغير تقريبا 3 سنين شابك في التروس بتاعتها والكل بيصرخ ومحدش عارف يعمل ايه ولو فصلو الماكنه التروس هتقفل علي الواد وهتقـ,ـتله خالص والواد دراعه تقريبا اتكسر ورقبته شبكت في الترس وبيدبح فيه
هنا دخل ادهم استوعب الموقف في لحظات مسك حديده طويله وحطها في التروس وقفها مؤقتا بس برضه بتتحرك ولو اتحركت اكتر هتفصل رقبه الواد خالص مد ادهم ايده ومسك التروس يوسعها شويه والماكنه بدأت تلف تاني وهو ماسكها بايديه علشان يوقفها او يحاول يوفقها وصرخ في اقرب واحد واقف جنبه انه يحاول يخرج الواد بسرعه لان التروس بتقطع ايديه ومش هيقدر يوقفها كتير
هنا راجل فاق واتحرك وبدأ يخرج الولد والماكنه بتحاول تلف وادهم ماسكها بكل قوته ومتجاهل ايديه اللي بتتقطع او كتفه اللي اتعور اللي ساند بيه كل همه ان الولد الصغير يطلع واخيرا طلعوا الولد وهو ساب ايديه
الولد كان خلصان خالص
وابو الواد واقف بيعيط ولسه هيشيله ادهم وقفه قاله لازم يوقفله النزيف علشان يوصل بيه للمستشفي وفعلا ربطله جروحه كانت الاسعاف وصلت واخدوه
الناس واقفه بتتفرج وبعد ما الاسعاف مشيت قالو لادهم علشان ايديه بس هو غطي دماغه كعادته ومشي وقالهم محدش يهتم بيه المهم الولد يبقي كويس
ادهم راح المستشفي يخيط ايديه وكتفه وهناك سأل الدكتور عن حالة الولد ايه
الدكتور قاله انه حالته حرجه لان السيور بهدلت جسم الواد ولانه صغير فمش عارفين يكملو اللحم المقطوع بايه ورقبته تقريبا مدبوحه بس الشريان الرئيسي ما اتصابش
ادهم وهو ماشي عدي يتطمن علي الولد
وهناك شافها واقفه ملاكه الجميل
وقف من بعيد يتأمل ملامحها الحزينه وكان نفسه لو يضمها مره اخيره وهو سرحان في تأملاته سمع صوت من وراه
::تقدر تقولي سيادتك واقف هنا بتعمل ايه؟؟؟
اتفاجئ ادهم بالصوت والتفتله وهنا جه حد واتدخل بينهم
_______________________
الحلقة التاسعة
ادهم وهو ماشي عدي يتطمن علي الولد
وهناك شافها واقفه.. ملاكه الجميل..
وقف من بعيد يتأمل ملامحها الحزينه وكان نفسه لو يضمها مره اخيره وهو سرحان في تأملاته سمع صوت من وراه
::تقدر تقولي سيادتك واقف هنا بتعمل ايه؟؟؟
اتفاجئ ادهم بالصوت والتفتله وهنا جه حد واتدخل بينهم
كان اللي بيتكلم عم محمود ابو ليلي
واتدخل ابو الولد واسمه خالد اترمي علي ادهم وحضنه جامد وجت مراته صفاء اخت ليلي وبتعيط وبتشكر ادهم
خالد: انا مديونلك بحياتي كلها سياده المقدم
انت لولا اتدخلت كان ابني راح
واختلطت الابتسامات والدموع والكل بيشكر ادهم وابو ليلي واقف بيتفرج ومش بينطق اخر شيئ عايزه انه يكون مديون لادهم بحاجه
وليلي واقفه بعيد بتحاول تشبع من حبيبها قبل ما يغيب عن عينها تاني
وهو بيراقبها وكل اللي بيفكر فيه انه يضمها ولو لمره اخيره
خلاص خلص الكلام والمفروض يمشي ويدوب مشي كام خطوه نادي ابو ليلي عليه وقرب منه
عم محمود: اوعي تتخيل انك بكده هتنول رضايا
ادهم باتسامه حزينه: انا لما اتدخلت انقذ الولد مكنتش اعرف انه له علاقه بيك او اعرف انه حفيدك فاكيد مش مستني منك اي شيئ. بعد اذنك واتمناله يخف بسرعه
مشي ادهم وقلبه هيخرج من مكانه واخر شيئ لمحه دموع حبيبته اللي ممنوع حتي يكلمها
وتعدي الايام وتحقيقاته مستمره في العصابه اللي اختفت تماما وملهاش اي اثر
وادهم عايز يمشي من البلد ويسيب المهمه دي لحد غيره بس بيفتكر وعده لليلي انه مش هيمشي
تعدي الايام ووجود ادهم في البلد مضايق ناس كتيره
العصابه اللي مختفيه
عم محمود اللي بيعد اللحظات علشان ادهم يمشي
وواحد تاني كاره وجود ادهم والواحد ده هو ابن عم ليلي حمدي
حمدي بيحب ليلي ويستني اليوم اللي يرتبط بيها وهيا مكنتش بتحب فمكنش يفرق معاها انها ترتبط بيه او بغيره لكن دلوقتي الوضع اختلف بقي في حبيب في حياتها وده خلاها ترفض اي حد يحاول يقرب منها
حمدي كان يعرف حد من افراد العصابه وهنا رسم خطته اللي هيضـ,ـرب بيها عصفورين بحجر واحد
في يوم ليلي كانت في رحله تبع المدرسه راحو لمنطقه اثريه وقضو اليوم فيها بس في اخر اليوم اختفت ليلي بفصلها كله
الكل بيدور عليهم
والخبر وصل لاهل البلد والكل طلع يجري علي مكان الرحله
ام ليلي كانت هتجنن علي بنتها ومن غير تفكير جريت علي مكان ادهم وخبطت عليه
ادهم: افندم
ام ليلي: انا مامت ليلي
ادهم: لو حضرتك جايه تسمعيني كلمتين زي ابو
الحلقه 16-17 والاخيرة
الحلقه ال 16
قبل الاخيرة
اخدهم ادهم وراح بيهم شقته
المنطقه كانت في حي راقي جدا عجبهم كلهم
العماره فخمه من بره
دخلو وطلعوا الاسانسير ووقفوا قدام الشقه
واول ما ادهم فتح الباب اتفاجؤا كلهم
اتفاجؤا لما لقوا الشقه فخمه جدا
ليلي: واو دي شقتك يا ادهم؟
ادهم: عجبتك؟؟؟
ليلي: عجبتني!! انت بتهزر دي تحفه زي الشقق اللي بشوفها في التليفزيون وبس
طبعا اتفرجت علي الشقه كلها واكتر حاجه عجبتها اوضه النوم الرئيسيه بحمامها الخاص والجاكوزي فيه والمطبخ لانه كان امريكان مفتوح علي الصاله وعجبها البار اللي فيه
ادهم: كان نفسي تعيشي معايا هنا…
عم محمود: متنساش اتفاقنا
ادهم: مش ناسيه
عم محمود: ما انت مليونير اهوه علشان كده مفرقش معاك المهر والشبكه
ادهم: ولا مليونير ولا حاجه
عم محمود: عربيه موديل السنه وشقه في منطقه راقيه جدا وعفش بالمنظر ده والبيت اللي بتبنيه وتقولي مش مليونير
ادهم: ايوه مش مليونير بس مش معدم
اولا الشقه اخدتها من اكتر من 8 سنين كانت الاسعار غير دلوقتي وبعدين انا راتبي عالي وكل مهمه بطلعها ليها حساب خاص وكل اصابه عليها تعويض والاهم ان انا مش من النوع اللي بصرف او ليا اهتمامات ماديه والسنه اللي فات جددت الشقه والعفش وساعدتني ساره في الموضوع ده واشتريت العربيه لان الفلوس موجوده وملهاش لازمه… اما البيت والمهر والشبكه والفرش فاعتقد ان بعد الفرح هبقي جبت اخري خلاص
عم محمود: هتفلس يعني ولا ايه؟
ادهم: مش هفلس بس لان شغلي موجود بس قصدي علي الحساب في البنك
ليلي: طب احنا ممكن نشتري المهم بس ونوفر
ادهم: لا يا حبيبتي مش قصدي كده اشتري كل اللي نفسك فيه الفلوس رايحه وجايه ما تقلقيش انتي
المهم اتفضلو في كذا اوضه نوم اللي تعجبكو اتفضلو فيها
ليلي: انا هاخد الاوضه دي تعال معايا
شدته من دراعه توريه الاوضه اللي عجبتها
ادهم: دي اكتر اوضه عجبتك؟
ليلي: اههه… اينعم عايزه اغير الوانها الغامقة دي بس هيا اكتر حاجه عجباني
ادهم: دي اوضتي
ليلي: اوضتك! طب خلاص اسيبهالك
ادهم: لا يا قمر هو انا اطول انك تنامي في اوضتي وبعدين اصلا انا هسيب الشقه كلها فنامي انتي هنا
ليلي: ليه؟ خليك معانا
ادهم: بجد اخليني؟؟ انتي عايزاني انا وابوكي في بيت واحد؟؟
عم محمود: ابوها هياكلك يعني ولا ايه؟
اتفاجؤا الاتنين بيه
ادهم: لا طبعا مش القضيه بس حضرتك اللي اعترضت علي وجودي انا وليلي في بيت واحد
ام ليلي: لا يا حبيبي سيبك من الكلام ده انت متخرجش من بيتك خليك معانا
ادهم: لا معلش
عم محمود: اترجوه شويه وهو يوافق
ادهم: انا مش عايز حد يترجاني.. بس مش عايز مشاكل مش اكتر
عم محمود: وانا بقي بسبب لسيادتك مشاكل صح؟
ادهم: انا مش عارف اقول لحضرتك ايه؟
ام ليلي: متقولش حاجه ومتخرجش من بيتك واللي ليه عندنا حاجه يجي ياخدها
ليلي: ايوه يا ادهم خليك وبعدين محسسني انك قاعد طول النهار في البيت؟؟
ادهم: خلاص براحتكم المهم هسيبكم ترتاحو وانا هرجع شغلي
عم محمود: استني قبل ما تنزل اللي عايز يشرب شاي هنا يلاقي ولا ينزل يشتري؟؟
ادهم: المطبخ فيه كل حاجه.. تعالي يا ليلي اوريكي مكان كل حاجه
ليلي بابتسامه: يالا بينا
اخدها المطبخ وعرفها علي اماكن الحاجات الأساسية
ادهم: مالك بتبصيلي كده ليه؟
ليلي: عاجبني المطبخ واستيله ذوقك ولا ذوقك مامتك
ادهم: مامتي؟؟!
ليلي: قصدي ساره مش تعتبر مامتك ولا ايه؟
ادهم: لا ما تعتبرش المهم اغلب عفش الشقه ذوقي هيا ساعدتني في شرا الحاجه مش اكتر وشويه ديكورات كده
ادي الشاي والسكر والغلايه والميه ايه تاني؟
ليلي: نسكافيه اهم حاجه النسكافيه
ادهم: اشمعني؟؟
ليلي: انا مدمنه نسكافيه
ادهم: امم قولتيلي وايه كمان؟؟
ليلي: اممم الشيكولاته بعشقها يعني بص في اي وقت عايز تصالحني تطلب حاجه ارشيني علي طول بشكولاته كادبوري هتلاقيني بقولك شبيك لبيك
ادهم: طيب كويس انك قولتيلي… ادي يا ستي النسكافيه اهوه
ليلي: عندك لبن بقي؟
ادهم: ايه محل البقاله اللي انا واقف فيه ده؟ لا يا ستي معنديش لبن اتفطمت من بدري
ليلي: خفه انا بشرب النسكاف باللبن
ادهم: النسكاف؟؟؟ حاضر اجيبلك لبن حاجه تانيه عايزاها
ليلي: لا يا حبيبي سلامتك
قربت ليلي عليه وهو مسك ايديها
ادهم: وحشتيني
ليلي: يااااااااه اخيرا افتكرت
ادهم: مش انتي اللي دخلتينا محل البقاله اعملك ايه يعني؟
ليلي: طب خلاص خرجنا من محل البقاله خلينا في المهم… انت كمان وحشتني قوي
شدها عليه ويدوب هيضمها
عم محمود: فين الشاي؟
ادهم: جاهز ثواني
ليلي حطت الشاي لابوها وادهم بصلها وهز اكتافه وكأنه بيقولها مش بايدي وراح على شغله
ابوي ليلي رفض ان ليلي تنام في اوضه ادهم نهائي
ادهم كان بيقضي النهار كله في شغله ويرجع اخر الليل وينزل بدري جدا
ليلي وابوها وامها بيشتروا جهازها
وادهم بينزل معاهم في الحاجات المطلوب منه وجوده فيها
عم محمود لاحظ ان ادهم ليه هيبه بين الناس وانه محترم جدا من اللي حواليه
ادهم اي شيئ بيعجب ليلي بيشتريه حتي لو غالي
وفي الاجهزه اللي كان بيجيبها
عم محمود: انت مش ملاحظ انك بتشتري بزياده
ادهم: ايه اللي بشتريه بزياده؟
عم محمود: الشاشات دي ما كفايه واحده كفايه الكبيره دي
ادهم: واحده في الصاله والتانيه لاوضه النوم
عم محمود: والتكيفات؟
ادهم: الجو في الصيف حر جدا في بلدكم وبعدين كل الاجهزه دي لراحه ليلي ولا ايه؟
عم محمود: براحتك انت حر
خلصوا شري العفش وكل حاجه تقريبا
وفي يوم بالليل الكل نايم ليلي صحيت وطلعت تشرب قابلت ادهم يدوب راجع
ليلي بصوت نعسان: اخيرا جيت؟؟؟
راحت ناحيته واستكانت في حضنه نايمه علي نفسها خالص
ادهم: انتي هتنامي ولا ايه؟
ليلي: انا نايمه اصلا
ادهم: طيب ادخلي كملي نومك
ليلي: لا عايزه افضل معاك شويه… تعال نقعد شويه في البلكونه
ادهم: ولو ابوكي صحي؟
ليلي: سيبك من ابويا بقي كلها بكره وهسافر
ادهم: تعالي
طلعوا البلكونه وفضلو يتكلمو ويتكلمو في اي حاجه وفي كل حاجه
وسكتو الاتنين مره واحده وبصوا لبعض واتقابلت العيون المشتاقه في نظره طويله وغابوا الاتنين مع بعض في لحظات لاتنسي
ليلي همست لادهم: بحبك قوي ومحتاجالك قوي جنبي وانت علي طول بعيد
ادهم: انا مش بعيد ابدا بس مش عارف قرب حاسس اني متكتف ومتراقب في كل حركة ابوكي واقفلي ومستنيلي اي غلطه
ليلي: هانت خلاص
ادهم: بجد هانت؟؟؟
ليلي: اكيد بعد ما نتجوز محدش هيدخل بينا تاني
ادهم: والشرط اللي ابوكي حاطه انك ما تسافريش معايا هنتصرف فيه ازاي؟
ليلي: هنطنشه ومش هيمنعني ساعتها اجي معاك وبعدين مالوش حكم عليا بعد ما اتجوزك
ادهم: اتمني ده يحصل لاني مش عارف اصلا ساعتها هعمل ايه وهبعد عنك ازاي؟
ليلي: متبعدش خليك جنبي ديما
ادهم: ولما تزهقي؟
ليلي: عمرك سمعت عن حد زهق من روحه؟؟
ادهم: وانا روحك؟؟-
ليلي: عندك شك في ده؟ انت روحي وقلبي وحياتي كلها.. انت اهم حاجه في حياتي فاهم؟ انا من غيرك ولا حاجه وبيك انت كل حاجه
ضمها ادهم لصدره
قعدوا جنب بعض وادهم قلع جاكته ولبسهولها وفضلو لحد الصبح مع بعض ونامو كده
اتفاجئ ادهم بايد علي كتفه بتصحيه
اصحوا اصحوا انتو الاتنين يالا
صحي ادهم وبص لقاها ام ليلي
ام ليلي: اصحوا بقي قبل ما ابوها يطلع ويعمل مشكله
ادهم: صحيت خلاص اهوه
ام ليلي: صحي البت دي
ادهم: ليلي ليلي اصحي بقي
ام ليلي: يا بنتي اصحي بقي ابوكي جاي
ليلي: يوه بقي سيبوني انام… اه رقبتي
ام ليلي: بقولك ايه؟ شيلها دخلها اوضتها بسرعه وانا هدخل لابوها لحد ما تدخلها ماشي
بصلها ادهم باستغراب
ام ليلي: انت لسه هتبصلي اتحرك ولا مش تقدر تشيلها؟
ابتسمتله وهيا داخله
ام ليلي: متطولش عندها واخرج علي طول
جاوبها بابتسامه وفعلا شالها ودخلها علي سريرها غطاها ويدوب هيمشي اتشعبطت في رقبته
ليلي: خليك جنبي
ادهم: انتي مصره تودينا في داهيه صح؟
ليلي: انت رخم
ادهم: رخم اه بس عايز اتجوز مش عايز مشاكل قبل الفرح سيبي رقبتي بقي
ليلي: طب بوسني وانا اسيبك
ادهم: أ….. ابوسك
باسها ادهم علي خدها بوسه خطف كده
ليلي: بجد!!! ده بجد ولا بتهزر؟؟
ادهم: بهزر اوعي بقي
ليلي: طب اطلع بره انا غلطانالك اصلا… انا غلطانه اني احب واحد زيك
ادهم وقف بسرعه: قصدك ايه بواحد زي؟؟
ليلي استوعبت كلامها وان ادهم حساس جدا
ليلي: مش قصدي اللي في بالك ده انا بهزر علي فكره مش قصدي حاجه يا ادهم
ادهم: ما علينا انا نازل شغلي
ليلي جريت ومسكته من ايده: مش قصدي حاجه انا بحبك وانت عارف ده كويس انا بس اتضايقت انك عامل حساب قوي لبابا وخايف منه كده
ادهم: خايف منه؟؟ مين قالك اني خايف منه؟ انا مبخفش من اي حد علي وجه الارض نهائي فاهمه؟ مبخافش…. لكن في فرق اني اخاف منه او اخاف علي حاجه بين ايديا حلم جميل او وهم خايف اصحي منه علي كابوس حياتي
انتي يا ليلي في ايد ابوكي لسه مش في ايدي وده اللي مخلينا عامله حساب مش اكتر
خايف علي زعله علشانك مش عايزك تزعلي منه او يزعل منك بسببي… مش عايز ابدا في يوم من الايام تختلفوا بسببي فاهمه؟
انا اتحرمت من العيله وده احساس ما اتمنهوش لعدوي فما بالك بحبيبتي
فهمتي بقي انا خايف من ايه؟ خايف انك تضيعي مني مش اكتر
ليلي: انا مش هضيع منك ابدا محدش يقدر يبعدني عنك ولو هختار
قاطعها ادهم: ولو في يوم اتحطيت في موقف انك تختاري بيني وبين عيلتك هنسحب من حياتك وهختار انا نيابه عنك العيله
ليلي: ادهم ارجوك
ادهم: ارجوكي انتي افهميني وقدري موقفي
انا اتاخرت علي شغلي بعد اذنك
مسكته: طيب علشان خاطري متمشيش زعلان
ادهم: انا مش زعلان يا ليلي ومش هزعل منك
بس بجد انا اتاخرت
خرج ادهم وما اخدش باله ان ابوها سمع الحوار ده كله بينهم
عدت الايام واخيرا جه اليوم الموعود
___________________________
الحلقة ال 17 والاخيره
اخيرا جه يوم الفرح كل حاجه جاهزه ومظبوطه كل شيء في مكانه
الناس ما بين فرحان ومستخسر ومستغرب
ليلي طايره من الفرحة هيا وامها واخوتها
ابوها مش عارف يعمل ايه مش عارف ولا قادر يتقبل ادهم وحاسس انه بيتخلي عن بنته وحاسس انه شايفها قدامه بنت خمس سنين بفيونكات وبياخدها بيسلمها لوحش مخيف ضخم… كابوس بيطبق علي صدره كل يوم
بيسلم بنته لوحش خوف مبهم ماليه مش عارف يتخلص منه
ادهم مرعوب احاسيس كتيره متلخبطه جواه
مش عارف ان كانت الخطوه دي صح ولا غلط
اه هو بيحب ليلي جدا بس كلمه ابوه عماله ترن في عقله “” انت عمر ما حد هيحبك ابدا وهتفضل مشوه من جواك ومن براك “””
كان نفسه اي حد يكون جنبه
حد يمسك ايده ويطمنه ويقوله كل حاجه هتبقي كويسه
بس هو لوحده زي ما طول عمره لوحده
اتصل علي تليفون امه يسمع صوتها
امه: الو مين معايا
ادهم: انا
امه: ________
ادهم: ارجوكي انا محتاجك النهارده قوي
امه :_______
ادهم: النهارده فرحي علي اجمل بنت في الكون ده كله….. مش عارف ان كان جوازي منها صح ولا غلط؟؟؟؟ مش عارف اتصرف ازاي؟ خايف اكون اناني وادخلها في وحدتي وبدال ما هيا تخرجني من عذابي ادخلها انا في عذاب ما تعرفش تخرج منه
ارجوكي ردي عليا قوليلي اي كلمه
قولي اي حاجه
كوني لمره واحده امي ارجوكي
دمعه متمرده نزلت من عينه غصب عنه
كان عندي امل انك تردي النهارده عليا مش عارف ليه بس تخيلت انك……… دي كانت اخر مره اكلمك فيها اوعدك انك مش هتسمعي صوتي تاني ابدا اوعدك
قفل السكه وغمض عنيه وقرر انه يمشي الطريق لاخره وزي ما يحصل يحصل لانه مهما يحصل عمره ما هيكون اسوأ من اللي عدي بيه قبل كده
اتكتب الكتاب خلاص وبعد كتب الكتاب ادهم اتفاجئ بعم ليلي جايله
عم ليلي: مبروك وربنا يتملكم علي خير
ادهم: الله يبارك فيك
عم ليلي: انا عندي طلب خاص منك
ادهم: اتفضل
عم ليلي: حمدي ابني ارجوك
ادهم: حمدي؟؟؟ حضرتك عارف ان حمدي هربان من ساعه الحادثه
عم ليلي: ايوه عارف
ادهم: امال حضرتك عايز ايه؟؟ مش فاهم
عم ليلي: انت اللي كنت ماسك القضيه وفي ايدك كل حاجه
ادهم: مش فاهم برضه حضرتك قصدك ايه؟
عم محمود: انت هنا واحنا بندور عليك هتتاخر
ادهم: لحظه بس
عم محمود: لحظه ايه؟ في ايه هنا؟
ادهم: كنا بنتكلم عن حمدي ولسه عايز افهم ايه المطلوب مني؟؟
عم محمود لاخوه: وهو ده وقت الكلام عن حمدي برضه؟؟؟
عم ليلي: ايوه وقته ماهو لو كان ابنك؟؟
عم محمود: وهو مكانش ابني واكتر وكنت هجوزه بنتي
عم ليلي: ومجوزتوش ليه بنتك هاه؟ لو كنت جوزتهاله مكنش حاجه حصلت لكن فضلت رابطه جنبك
ادهم واقف بينهم ساكت وباصص للارض
عم محمود: انا مربطوش جنبي انا كلامي كان واضح قولتله لما تخلص كليتها وهيا تقرر بنفسها ما وعدتوش ابدا
ادهم: اعتقد فعلا ان ده مش وقته
عم ليلي: انت اخدت منه ليلي متاخدش حريته كمان
ادهم: انا ما اخدتش ليلي منه لانها مكانتش معاه اصلا وحريته مش انا برضه اللي باخدها هو اختار طريقه بنفسه
عم ليلي: ليلي كانت ليه من وهما عيال صغيره اما طريقه هو اختاره غلط
ادهم: حضرتك عايز ايه مني بالظبط؟ ؟
عم ليلي: ميكونش ليه علاقه بالقضيه
ادهم: وحضرتك رايك ايه؟؟
عم محمود: ده ابن اخويا عايز يكون رايي ايه عيل وغلط
ادهم: وحضراتكم متخيلين اني لو شيلته من القضيه هيرجع البلد ويعيش عادي فيها
عم ليلي: مش هيرجع البلد هخليه يسافر اي مكان بره مصر بس ميبقاش مطارد من القانون
ادهم بيبص لحماه
عم محمود: متبصليش انا قلتلك انه ابن اخويا لو تقدر تعمل حاجه اعملها وسيبه لضميره
ادهم: حاضر هعمل اللي اقدر عليه
مشيوا وراحو لليلي واول ما ادهم شافها اتصدم من جمالها
وسال نفسه سؤال قديم
ينفع مسخ مع ملاك بالشكل ده؟ ؟
راحو القاعة وادهم ساكت تماما مش بينطق
ليلي: ادهم حبيبي مالك ساكت كده ليه؟
ادهم: ماليش متشغليش بالك
ليلي: طيب في ايه؟ مش عجباك ولا ايه؟
ادهم: مش عجباني؟؟؟؟ مش هرد عليكي اصلا
قامو رقصوا سلو مع بعض علي اغنيه برتاح لرامي صبري اسمعوها
طلبوا من ادهم يهدي اغنيه لليلي
اهدالها اغنيه سامو زين مش قادر ابعد عنك
وليلي هديته اغنيه اليسا علي بالي حبيبي
وطول الفرح ليلي بترقص وبتتنطط مع صاحبتها وادهم بيراقب كل الوشوش حواليه وبيقري شفايفهم ( هو كظابط اتعلم يقري حركه الشفايف)
ويراقب ابو ليلي وكل واحد بيباركله بيرميه بكلمه
بيراقب اصحابه مستغربين من ليلي
بيراقب صبري وساره ومصطفي مين دول اصلا؟؟ دول مجرد ناس صعب عليهم دول مش اهله
بيراقب ويراقب ويراقب
بيراقب ليلي من بعيد ورده جميله وتخيل نفسه بيرقص معاها
تخيل نفسه راجل طبيعي وسيم عيلته حواليه
شاف امه وابوه واخته واخوه حواليه بيرقصوا معاه
شاف اصحاب كتير حواليه
شاف ناس بتحسده علي ليلي
بس فاق لقي نفسه لوحده بعيد حس انه وحيد وحيد جدا حس انه غلط اكبر غلطه حس انه غريب عن كل اللي حواليه ده
وسال نفسه هو بيعمل ايه هنا؟؟ ؟
ادهم ادهم ادهم
ادهم: هاه
ليلي: انت فين؟ اللي واخد عقلك تعال يالا
ادهم: ليلي كفايه ارجوكي كفايه كده يالا بينا
ليلي: لا يا ادهم لسه بدري خلينا
ادهم: ارجوكي حسي بيا، انتي عملتي الفرح اهوه اللي كان نفسك فيه كفايه بقي يالا
ليلي: اللي كان نفسي فيه؟؟؟ وانت مكنتش عايز فرح
ادهم: فرح؟؟؟ علشان الناس تتفرج عليا؟؟؟ ارجوكي كفايه كده يالا
ليلي: ادهم في ايه مالك؟ ؟
ادهم: مالي؟؟؟ انتي بجد مش عارفه مالي؟؟
ليلي: ادهم في ايه؟ ؟
ادهم: في ايه؟ ؟ تحبي اقولك كل واحد بيقول ايه؟
بصي يا ستي
الراجل اللي هناك ده بيقول ازاي القمر ده تتجوز ده
الستات اللي هناك دول كل واحده بتتصعب عليكي وعلي بختك المايل
البنات اللي هناك فرحانين علشان طول عمرك حاطه راسك في السما ومش عاجبك حد وبيقولو صومتي صومتي وفطرتي علي ده
اما بقي كل واحد بيبارك لابوكي بيواسيه علي حظ بنته تحبي اقولك زياده ولا كفايه
ليلي قربت منه ومسكت وشه بايديها
ليلي: انت شاغل بالك بكل الناس دي ليه؟ هاه
بصلي انا وبس…. انا بقيت مراتك ومحدش من كل دول يقدر يبعدنا عن بعض ابدا… بحبك انت وبس بحب كل مافيك ( حظت ايدها علي جرح وشه) حتي ده بحبه فيك… انا ما يهمنيش كل الناس دي واصريت اني اعمل فرح علشان تعيشه معايا وما تحسش ابدا انك اقل من اي حد لو اعرف انك هتقعد تراقب الناس كده مكنتش عملته… ادهم انا بحبك انت وبس بحبك زي ما انت كده اوعي تعمل لاي حد اعتبار اوعي تسمح لحد يدخل بينا
ادهم: طيب ارجوكي كفايه كده
ليلي: كفايه يالا بينا علي بيتنا
روحو بيتهم ومعاهم الناس بيزفوهم
مامت ليلي وابوها دخلوا معاها البيت
ليلي ومامتها دخلو اوضه النوم اللي اتفاجؤا ان ادهم فارشها كلها ورد
مامت ليلي: يا بختك بيه ربنا يسعدك… حافظي عليه يا ليلي ده هيحطك جوه عنيه
ليلي: عارفه… انا كمان بحبه قوي
بره بقي كان ابو ليلي مع ادهم كانت دماغه بتسترجع الحوار اللي سمعه بين ادهم وليلي وبيفكر ازاي يستغل اللي سمعه ده لصالحه
عم محمود: اعتقد كده انتصرت
ادهم: انتصرت؟؟؟ انتصرت في ايه بالظبط؟ ؟
عم محمود: اخدت بنتي مني؟؟؟
ادهم: بس انا مش عايز اخد بنتك منك انا بحبها وبس وكل اللي نفسي فيه انك تسمحلي قاطعه: اسمحلك ايه؟ ؟ انك تدخل عيلتي وبيتي وتبقي زي عيل من عيالي صح؟؟
ادهم قلبه بيوجعه: وليه لأ؟
عم محمود: مش عايز يا اخي هو بالعافيه
ارجوك ارجوك رجعلي بنتي ارجوك
ادهم: انت بتترجي ايه بالظبط؟ ؟
عم محمود: انت اثبت انها بتحبك انت اكتر مني
ادهم: انا مش عايز اثبت حاجه انا عايز اعيش معاها وبس
عم محمود: بكره بعد ما اللمعه تروح واللهفه تروح وتروح الغشاوه اللي علي عنيها وتشوفك زي ما الكل بيشوفك هتعمل ايه؟ ؟
ادهم: مش عايز افكر في بكره
عم محمود: طبعا مش عايز تفكر فيه لانك اناني مصدقت لقيتها ومسكت فيها ومبتفكرش غير في نفسك وبس
ادهم: لا ده مش صح
عم محمود: لا صح لو كنت بتحبها كنت بعدت عنها كنت فكرت في بكره اول ما ليلي تفوق هتبعد عنك وهتتحسب عليها جوازه وبس ومش بعيد الناس يقولو غلطت معاه علشان كده اتجوزته انت مش هتخسر حاجه لكن هيا هتخسر كتير هتخسر حياتها سعادتها عيلتها
ده اللي انت عايزه صح انها تبقي زيك؟؟؟
ادهم: لأ لا انا عمري ما فكرت كده ابدا
عم محمود: امال فكرت في ايه؟ الحياه هتبقي وردي وهيا هتفضل عاميه وانا افتحلك بابي؟؟؟
ادهم بص للارض لان ده تفكيره انه هيبقي هو وليلي عيله صغيره وممكن تكبر وتعوضه
عم محمود: لا فوق من اوهامك دي…. ليلي لو استمرت معاك هطردها من بيتي وهقفل بابي في وشها هتبري منها
ادهم: لأ انت بتحبها
عم محمود: وهيا فضلتك عليا وعندها استعداد تخسرني علشانك يبقي هبقي عليها ليه علشان كده بترجاك ترجعلي بنتي
وبعدين اهوه انا واخويا بنتخانق مع بعض بسببك ومن يوم ما ليلي اتخطبتلك مدخلش بيتي العيله هتتفرق بسببك
ادهم: لا مش بسببي انا مليش علاقه باللي حصل
عم محمود: ليلي كانت موافقه علي حمدي ومرفضتوش غير بعد ظهورك انت في حياتها يبقي ده تسميه ايه؟ ودلوقتي بقي ليلي كمان هتخرج بره العيله
يا ترجعهالي يا تاخدها الليله وتمشي من البلد دي ومترجعوش تاني ابدا وانا هنسي اني خلفتها في يوم من الايام
ادهم: لا كله الا ده اوعي تطردها
عم محمود: انا مش عايزك في حياتها يبقي تختار يا ترجعهالي يا تاخدها وتمشي؟؟؟؟؟
ادهم سكت اخيرا فاق من الحلم كان عارف انه هيفوق بس هو ملحقش يعيش الحلم اصلا
عم محمود: قولت ايه؟ ؟ ؟
ادهم: عايزني اعمل ايه؟ ؟ اطلقها دلوقتي وتاخدها معاك؟؟؟
عم محمود: لا طبعا انت عايز تفضحني ولا ايه؟
ادهم: امال عايز ايه؟؟
عم محمود: يومين كده وتسافر بحجه شغلك وشهرين ولا حاجه وتبعتلها ورقتها وهيا مش هتعرف توصلك وشويه وهتنساك
مهرك وشبكتك هرجعهملك والبيت ده هعوضك عن تمنه علشان متبقاش خسرت حاجه
ادهم : هههههه شبكتي ومهري؟؟؟ هو ده اللي انا هخسره انت بتحكم عليا ارجع السجن تاني اكمل فيه حياتي وتقولي شبكتي ومهري
شبكتي ومهري دول بتوع ليلي اعتبره تعويض عن الجوازه اللي اتحسبت علي بنتك مش عايز حاجه….
عم محمود: انا اسف بس مش قادر… شوف واحده غير ليلي… دي بنتي…. شوف واحده زيك وعيش معاها بس بلاش بنتي
انا اسف بس اتمنالك ان ربنا يعوضك
طلعت مامت ليلي
ام ليلي: يالا يا ابو ليلي خلينا نسيب العرسان وحدهم
عم محمود: يالا بينا
ام ليلي: خلي بالك من ليلي يا ادهم
ابتسم ادهم ليها
مشيوا وهو فضل مكانه مش عارف يتحرك وليلي مستنياه يطلع عندها ولما انتظارها طال نزلت عنده كانت قلعت فستانها ولابسه روب ابيض طويل
لقته قاعد في الظلمه
ليلي: حبيبي مالك؟؟؟ استنيتك كتير مش هتبطل التقل ده بقي ولا ايه؟ ؟
ادهم: ______
ليلي: انت عايزني انا اترجاك ولا ايه؟ تعالي فوق بقي يالا
بتشده من ايده بس هو فضل قاعد مكانه
ليلي: ادهم في ايه؟ مالك؟
ادهم: _______
ليلي: حبيبي في ايه؟ ؟
ادهم: في اني زهقت!!! زهقت من كل حاجه!!! زهقت منك ومن ابوكي ومن كل حد فاكر نفسه احسن مني
ليلي: ادهم في ايه مالك؟ ؟
ادهم: جوازي منك كان اكبر غلطه في حياتي انتي فاهمه؟ ؟ جوازي منك غلط
ليلي :: انت بتقول كده ليه؟ في ايه؟؟؟
ادهم: في اني زهقت…. مش عايز جروح تانيه كفايه لحد كده
ليلي: ادهم انا بحبك
ادهم: وانا مش عايز حبك ده مش عايزه…
ليلي: ادهم ارجوك
ادهم: ترجوني ايه؟ انا اللي برجوكي ابعدي عني ابوس ايدك ابعدي عني بقي هو بالعافيه ولا ايه؟ ؟ انا _ مش _ عايزك
فهمتي ولا اقول تاني؟ ؟ مش عايزك
من يوم ما شفتك وانا كل ما ابعدك عني بترجعي تاني وبحاول اقنع نفسي اني افضل معاكي بس برجع وابعد وانتي تقربي لحد امتي مش عارف؟؟؟ ايه ما بتحسيش ابعدي عني بقي كفايه كده مش قادر هتخنق
كنت فاكر اني هتجوز والحياه هتبقي عادي بس لا هتخنق مش قادر استحمل
لعلمك يومين وهسافر لوحدي ومش هتشوفي وشي تاني وبعدين هبعتلك ورقتك واطلقك
ليلي: ادهم….
ادهم: فهمتي؟ خلاص فوقي بقي انتهي كله انتهي……… بعد اذنك
سابها ومشي وهيا واقفه مذهوله
بقي هيا دي ليله العمر؟
هيا دي الليله اللي بتحلم بيها من زمان؟
هو ده ادهم اللي حبته وعشقته؟؟
هيا صاحيه ولا ده كابوس وهتصحي منه؟؟
حياتها انتهت من قبل ما تبدأ
اخيرا استوعبت ان ده بجد واخيرا قعدت في الارض تعيط وتندب حظها
______________________
وهنا تكون خلصت حكايتنا
اتمني انها تكون عجبتكم